عەبدولڕەحمان ئاپۆ ئەندامی لیژنەی ناوەندیی پارتی دیموکراتی کوردستانی سووریا (PDK.S) لە گفتوگۆ لەگەڵ کوردپرێسدا ئاماژەی دا بە ئەگەری هێرشی زەمینیی سوپای تورکیا بۆسەر کوردستانی سووریا و وتی: تورکیا لەو وڵاتە داگیرکەرانەیە کە چاوی تەماحی بڕیوەتە خاکی کوردستان و دوژمنایەتیی مێژوویی لەگەڵ کورد هەیە و بەردەوام بەنیازە کورد بێهیوا بکات بۆیە لە ڕۆژی یەکەمی گۆڕانکارییەکانی سووریاوە بوو بە وڵاتی سەرەکی قەیران نانەوە لە سووریا.

ناوبراو وتی: تورکیا بەکەڵک وەرگرتن لە خەمساریی وڵاتان و حکوومەتی ناوەندیی سووریا دەستی داوەتە داگیرکاری لە ناوچە کوردنشینەکان.

عەبدولڕەحمان ئاپۆ ڕاشیگەیاند: تورکیا ناوچە کوردستانییەکان واتا عەفرین، باب، ترابلۆس، سەرێکانی . گرێ سپیی داگیر کردووە و ئێستاش بیر لە هەڵمەتێکی دیکە دەکاتەوە.

ئەندامی لیژنەی ناوەندیی پارتی دیموکراتی کوردستانی سووریا (PDK.S) وتیشی: پاش شەڕی ئۆکراینا و ڕووسیا هەندێک لە نەخشە و سیناریۆکان گۆڕیاون. تورکیا خەریکی تۆپبارانی ناوچە کوردنشینەکانە و ئەردۆغان باس لە جێگیر کردنی 1 ملیۆن پەنابەری سووری لە کوردستان دەکات.

ناوبراو زیادی کرد: پێنجشەممەی ڕابردوو کۆبوونەوەی ئاسایشی نیشتمانیی تورکیا بەڕێوەچوو و دەنگیان بە ئۆپەراسیۆنی سەربازی دا. ئامانجی تورکیا دامەزراندنی ئیمپراتۆریەتی عوسمانییە.

عەبدولڕەحمان ئاپۆ وەبیری هێنایەوە: تورکیا بە دژایەتی کردنی ئەندامبوونی سوێد و فینلاند لە ناتۆ نیەتی خۆی بۆ ئۆپەراسیۆنی نوێ لە کوردستانی سووریا نیشان دا.

ناوبراو ڕاشیگەیاند: ئەگەر ئۆپەراسیۆنێکی نوێ دەست پێبکات پرسی کوردی سووریا زیاتر لە ڕابردوو لێڵ ئەبێت، تورکیا بە بیانووی ئازاد کردنی باکووری سووریا کوردستانی کاول کردووە.