هەواڵ عیسا ئەندامی لیژنەی ناوەندیی پارتی یەکێتیی کوردستانی سووریا (P.Y.K.S) لە گفتوگۆ لەگەڵ کوردپرێسدا ئاماژەی دا بە چوارەمین ساڵی داگیر کردنی عەفرین لەلایەن تورکیا وگرووپە میلیشیاکانەوە و ڕایگەیاند: بەرلە هەموو شتێک کورد دەبێت لە ناو خۆیدا ڕێککەوێت تا بە پشتگیریی کۆمەڵگای جیهانی و گوشار خستنە سەر تورکیا ئەو وڵاتە و گرووپە چەکدارەکان ناچار بە چۆڵکردنی عەفرین بکەن.

ناوبراو درێژەی دا: کوردەکان لە بارودۆخێکی دژواردان و نەک هەر لە عەفرین و ناوچە داگیر کراوەکاندا بەڵکوو لەناوچەکانی ژێر کونترۆڵی ئیدارەی خۆسەریشدا دۆخێکی سەختیان هەیە.

ناوبراو وتیشی سیاسەتەکانی پەیەدە و پەکەکە بووەتە هۆی ئەوەی تا کوردستانی سووریا ڕۆژ لە دوای ڕۆژ لە بوونی کورد چۆڵ بکرێت. ئێمە هیوادار بووین گفتوگۆی کوردی-کوردی دۆخێک فەراهەم بکات تا ببێتە هۆی یەکگرتنی ناوخۆیی کوردەکان لە سووریا بەڵام پاش بە بنبەست گەیشتنی دانوستانەکان گوشارەکانی پەیەدە و ئاگردانی نووسینگەکانی ئەنجومەنی نیشتمانی و ئەشکەنجەی لایەنگرانی ئەنەکەسە زیاتر بوویەوە.

ئەندامی لیژنەی ناوەندیی پارتی یەکێتیی کوردستانی سووریا (P.Y.K.S) ئاشکراشی کرد چەند ڕۆپز پێش ئێستا ڕۆژنامەنووسێک بە ناوی ژیندار بەرکات ئەشکەنجە کرا و لە چەند کیلۆمەتریی حەسەکە بە برینی قووڵەوە جێهێڵدرا بوو. کوردستانی سووریا لە قۆناخێکی زۆر دژواردایە و کڕینی بژیوی ژیان لەوان نان و نەوت و شەکەر و گۆشت زۆر دژوار بووەتەوە.

هەواڵ عیسا جەختی کردەوە: ئەمانەش هەموو ئەنجامی سیاسەتەکانی پەیەدە-یە کە بەشێکن لە پەکەکە و داگیر کرانی عەفرین و سەرێکانی و گرێ سپی ئەنجامی ئەو بیانووەیە کە پەکەکە داویەتە دەستی تورکیاوە.