بەپێی هەواڵی کوردپرێس، لوند گولتەکین ڕۆژنامەنووسی کورد و شرۆڤەکاری سیاسی کاردانەوەی بۆ وتەکانی ئەمدواییەی ڕەجەب تەییب ئەردۆغان سەرۆک کۆماری تورکیا نیشان داو و دەڵێت: ئەم وتانەی ئەردۆغان هەوڵێکە بۆ کردنەوەی ڕێگایێک بۆ دانوستان لەگەڵ عەبدوڵا ئۆجەلان و دەشڵێت ئەردۆغان بۆ شکستی پارتی دیموکراتی گەلان (HDP) ئامادەیە لەگەڵ پارتی کرێکارانی کوردستان (PKK) هاوکاری بکات.

شایانی باسە هەفتەی ڕابردوو ئەردۆغان لە وتەکانیدا ئیدیعای ئەوەی کرد کە پەیوەندی لەنێوان هەدەپە و پەکەکە هەیە و ئۆجەلان سەرکردەی پەکەکە هەقی بەسەر دەمیرتاشەوە هەیە.

لوند گولتەکین لە کاردانەوەیێکدا بۆ ئەم وتانەی سەرۆککۆماری تورکیا، لە بەرنامەی ڕاستەوخۆی «دوو ڕوانگە»ی کەناڵی خەڵک تی ڤی وتی: سەلاحەدین دەمیرتاش بەتۆمەتی ئەندامێتیی پەکەکە دادگای کرا و خرایە زیندانەوە. ئەردۆغان شەو و ڕۆژ هەدەپەع تۆمەتبار دەکات بە هاوکاری کردنی پکەکە. بەڵام خۆی لە بەرنامەی ڕاستەوخۆدا بەبۆنەی ئەوەی کە دەمیرتاش لە پەکەکە دوور کەوتۆتەوە وەکوو گوتەبێژی پەکەکە کار دەکات و پەیمان بۆ ئۆجەلان دەنێرێت.

لوند گولتەکین ئاماژەشی دا بە دوو ڕێیانی چارەسەر کردنی پرسی کورد لە تورکیا کە یەکیان ڕێگای هەدەپە-ە و لە ڕێگای ئاشتیەوەیە و دووهەمیش ڕێگای پەکەکە-یە کە ڕێگای چەک و توندئاژۆیە و وتی: «ئێمە هەدەپە-مان دەوێت تا پرسی کورد لە ڕێگای سیاسیەوە چارەسەر بکرێت تاکوو توندئاژۆیی پەکەکە دوور بخەینەوە. بەڵام سەرۆکی تورکیا بۆ سڕینەوەی هەدەپە لایەنگری لە پەکەکە دەکات.»

لوند گولتەکین لایەنگران و دەنگدەرانی ئەکەپە-ی کردە بەردەنگ و وتی: پەکەکە هەمیشە لەژێر کونترۆڵی حکوومەتی تورکیا جووڵاوەتەوە و ئەردۆغان جارێکی دیکە ئەم بابەتەی سەلماند.

ناوبراو دەشڵێت: حکوومەتی تورکیا ئەگەر ویستبای تا ئێستا پەکەکە-ی بنبڕ کردبوو، PKK بوونی هەیە چوون حکوومەتی تورکیا ئەوەی دەوێت بۆ ئەوەی هەر کات ویستی بەکاری بهێنێت و ئێستاش کەڵک لە پەکەکە وەردەگرێت بۆ کونترۆڵ کردنی سیاسەتی کوردی.حکوومەتی تورکیا لەم ڕێگایەوە سیاسەتی ڕەوای کوردی دەخاتە ژێر پێ تەنانەت ئەگەر نرخەکەشی سەرکەوتنی پەکەکە بێت.