بەپێی هەواڵی کوردپرێس، مەسعوود بارزانی سەرۆکی پارتی دیموکراتی کوردستان لە پەیامێکدا لە بارەی هێرشی هێزەکانی سەر بە حکوومەتی کاتیی سووریا بۆ سەر گەڕەکە کوردنشینەکانی حەلەب ڕاگەیێندراوێکی بڵاو کردەوە دەڵێت: "ئەو بارودۆخە مەترسیدار و ئەو شەڕ و توندوتیژیەی کە ئێستا لە شاری حەلەب هەیە جێگەی نیگەرانییەکی زۆرە و مەترسی لەسەر ژیانی خەڵکی سڤیل و هاووڵاتیانی بێتاوان دروست کردووە و هەڕەشەی پاکتاوی رەگەزی لەدژی کورد لەو ناوچەیەدا هەیە".

لە درێژەی پەیامەکەیدا بارزانی دەشڵێت: "داوا لە دەستەڵاتدارانی سووریا دەکەم ناکۆکیی سیاسی نەکرێتە ناکۆکیی نەتەوەیی و لەو کێشە و گرفتانەی لە ناوچەی حەلەبدا هەن رێگە نەدرێ هاووڵاتیانی کورد تووشی گوشار و زەبروزەنگ و دەرکردنیان لە شوێنی باب و باپیرانیان و پاکتاوی رەگەزی ببنەوە، هەروەها داواش لە لایەنە کوردییەکان و بە تایبەت (هەسەدە) دەکەم ئەوەی لە توانایاندا بێت بیکەن لەپێناو راگرتنی شەڕ و پێکدادان".

شایانی باسە ئەنجومەنی گەڕەکە کورد نیشینەکانی حەلەب داوایان لەسەر کردە کوردەکانی هەرێمی کوردستان بە تایبەتی سەرکردەکانی پارتی و یەکێتی کرد لەسەر ئەو هێرشانەی دەکرێتە سەر گەڕەکەکانیان پاڵپشتیان بکەن.

دەقی پەیامەکەی بارزانی:

بەناوی خودای مەزن و دلۆڤان

گۆڕانکارییە سیاسیەکانی سووریا دەرفەتێکی باش بوو بۆ دۆزینەوەی رێگاچارەیەکی گونجاو بۆ ئەوەی رەچاوی مافە رەواکانی گەلی کورد لە سووریا بکرێت و سەرجەم کێشەکانیش چارەسەر بکرێن. لەو پێناوەشدا لەگەڵ هەموو لایەنەکان هەوڵی زۆرمان دا کە پێویستە هەرچی گرفت و ناکۆکی هەیە لەڕێگەی دیالۆگ و بە شێوازی ئاشتیانە چارەسەر بکرێن.

بەڵام ئەو بارودۆخە مەترسیدار و ئەو شەڕ و توندوتیژیەی کە ئێستا لە شاری حەلەب هەیە جێگەی نیگەرانییەکی زۆرە و مەترسی لەسەر ژیانی خەڵکی سڤیل و هاووڵاتیانی بێتاوان دروست کردووە و هەڕەشەی پاکتاوی رەگەزی لەدژی کورد لەو ناوچەیەدا هەیە.

داوا لە دەستەڵاتدارانی سووریا دەکەم ناکۆکیی سیاسی نەکرێتە ناکۆکیی نەتەوەیی و لەو کێشە و گرفتانەی لە ناوچەی حەلەبدا هەن رێگە نەدرێ هاووڵاتیانی کورد تووشی گوشار و زەبروزەنگ و دەرکردنیان لە شوێنی باب و باپیرانیان و پاکتاوی رەگەزی ببنەوە، هەروەها داواش لە لایەنە کوردییەکان و بە تایبەت (هەسەدە) دەکەم ئەوەی لە توانایاندا بێت بیکەن لەپێناو راگرتنی شەڕ و پێکدادان و رێگەگرتن لە خوێنڕشتنی زیاتر و هەردوولا کار بۆ گرتنەبەری رێگەی دیالۆگ و گفتوگۆ بکەن بۆ چارەسەرکردنی کێشەکان. ناکرێ بوونی ناکۆکیی سیاسی ببێتە هۆی ئەوەی ژیانی خەڵکی سڤیل بخرێتە ژێر مەترسی و پاکتاوی رەگەزی لە دژی گەلی کورد رووبدات و ئەوە تاوانی دژی مرۆڤایەتیە و دەرئەنجامی مەترسیداری لێدەکەوێتەوە.