بەپێی هەواڵی کوردپرێس، کۆمەڵەی پیشەسازیی نەوتی کوردستان ناسراو بە "ئەپیکور" لە ڕاگەیەنراوێکدا دەڵێت: "کۆمپانیا نێودەوڵەوتییەکانی نەوت و حکوومەتی هەرێم بە نیازێکی پاکەوە لەگەڵ حکوومەت و نووسینگەی سەرۆک وەزیرانی عێراق، دەستیان بە گفتوگۆ کرد بۆ گەیشتن بە بڕیارێکی تایبەت بەدەستپێکردنەوەی هەناردەی نەوتی هەرێمی کوردستان کە گونجاو بێت، لەگەڵ رێککەوتنە یاساییەکان و بوودجەی عێراق".

ئەپیکۆر ڕوونیشی کردەوە: "بۆمان ڕوون بوەتەوە وەزارەتی نەوتی عێراق ئامادە نییە گفتوگۆ لەسەر چارەسەرێک بکات و رێز لە گرێبەستی کۆمپانیاکان بگرێت".

لە ڕاگەیەندراوەکەدا ئاماژە بەوەش دراوە، عێراق هەوڵ دەدات ڕێگەیێک بگرێتەبەر، بەشێوەیێکی تاکلایەنە جێگرەوەیێک بۆ چوارچێوە یاساییەکە و گرێبەستە بەرکارەکانیان لەگەڵ حکوومەتی هەرێم دابنێت.

لە کۆتایی ڕاگەیێندراوەکەدا کۆمەڵەی پیشەسازیی نەوتی کوردستان جەخت دەکاتەوە : "بەڵام تا پابەندبوون لە حکوومەتی عێراقەوە نەبێت، ئامادەنین دەست بەهەناردەکردنەوەی نەوت بکەین".