سووریا بەبێ چارەسەرکردنی پرسی کورد ئارامی نادۆزێتەوە

فەرماندەی گشتیی هێزەكانی سووریای دیموكرات ڕایدەگەیێنێت دەسەڵاتی نوێ لە سووریا لەژێر گوشاری تورکیادایە بۆ هەنگاونان لەدژی ناوچەکانی ژێر دەسەڵاتی هەسەدە، دەشڵێت سووریا بەبێ چارەسەرکردنی پرسی کورد ئارامی نادۆزێتەوە.

بەپێی هەواڵی کوردپرێس، مەزڵووم عەبدی، فەرماندەی گشتیی هێزەکانی سووریای دیموکرات لە بەرنامەیێكی تایبەتی (بی بی سی) ڕایگەیاند: "سووریا بەبێ چارەسەرکردنی پرسی کورد ئارامی نادۆزێتەوە، داوای دامەزراندنی دەسەڵاتێکی لامەرکەزی لە سووریا و دانپێدانانی مافە نەتەوەیی و کولتووری و سیاسییەکانی نەتەوەی کورد لە دەستووری نوێی سووریادا دەكەین".

ئاماژەی بەوەشکرد، لایەنی کوردی هەوڵ دەدات بەشێک بێت لە حکوومەتی نوێی دیمەشق، ئاماژە بە بەردەوامیی گفتوگۆی نێوان هەردوولا دەکات و وتیشی: "هەماهەنگی ئەمنی لە نێوان ئەوان و دەسەڵاتی نوێی دیمەشقدا هەیە بۆ ئەوەی ململانێ لە نێوانیاندا دروست نەبێت".

ئەو سەرکردەیەی کورد پێی وایە، کە دەسەڵاتی نوێ لە سووریا لەژێر گوشاری تورکیادایە بۆ هەنگاونان لەدژی ناوچەکانی ژێر دەسەڵاتی هێزەکانی سووریای دیموکرات لە باکوور و باکووری ڕۆژهەڵاتی سووریا.

مەزلوم عەبدی دەشڵێت: "هێزەکانی لە ڕاستیدا لەگەڵ تورکیا لە حاڵەتی شەڕدان و داوای ئاگربەستی نێوان هەردوولا دەكەین، کە تورکیا ڕەتیدەکاتەوە".

عەبدی ڕوونیشی کردەوە، کە لە ناوچەی مەنبج ئاگربەستێکی کاتی لە ڕێگەی نێوەندگیری ئەمریکاوە ئەنجام دراوە، بەڵام ئەو گرووپە چەکدارانەی کە تورکیا پاڵپشتی دەکرێن، پێشێلکارییان کردووە.

ناوبراو ئاماژەی بەوەش كرد، لایەنی کوردی لە پەیوەندیدایە لەگەڵ ئیدارەی نوێی ئەمریکا، سووریا وڵاتێکی ستراتیژی و گرنگە و واشنتۆن دەتوانێت ڕۆڵی هەبێت لە داڕشتنی داهاتووی وڵاتەکەی.

فەرماندەی گشتیی هەسەدە ئاشکرای کرد، کە پەیامێکی لە سوپای ئەمریکا لە ناوچەکە پێگەیشتووە، کە لە ئێستادا هیچ پلانێک نییە بۆ کشانەوەی هێزەکانی ئەمریکا لە ناوچە جێگیرەکانیان لە ناوچەکانی ژێر دەسەڵاتی هێزەکانی سووریای دیموکرات لە باکوور و باکووری ڕۆژهەڵاتی سووریا.

News Code 224923

Tags

Your Comment

You are replying to: .
captcha