هەسەدە هەنگاوێکی جدیی هەڵگرتووە بۆ دانوستانی ڕاستەقینە لەگەڵ دیمەشق

ڕۆژنامه‌ی شه‌رق ئه‌لئه‌وسه‌ت بڵاویکردەوە، ڕاگەیاندنی سەرکردایەتی هێزەکانی سووریای دیموکرات (هەسەدە) بۆ چونە ناو پێکهاتەی سوپای سووریا، هەنگاوێکی جدییە بەرەو دانوستانی ڕاستەقینە لەگەڵ دیمەشق.

کوردپرێس: ڕۆژنامه‌ی شه‌رق ئه‌لئه‌وسه‌ت لە زاری سەرچاوەکانیەوە لەناو هێزەکانی سووریای دیموکرات، بڵاوی کردەوە، ڕاگەیاندنی سەرکردایەتی هێزەکانی سووریای دیموکرات لەبارەی تێکەڵ کردنی دامەزراوە سەربازی و ئەمنییەکانی لەگەڵ دامەزراوە ئەمنییەکانی ئیدارەی خۆسەر، وەک ئامادەکارییێک بۆ چوونە ناو پێکهاتەی سوپای سووریا، کە  هەنگاوێکی جدییە بەرەو دانوستانی ڕاستەقینە لەگەڵ دیمەشق.

هاوکات ئەبوو عومەر ئدلیبی، یەکێک لە بەپرسانی هێزەکانی سووریای دیموکرات بە شه‌رق ئه‌لئه‌وسه‌تی ڕاگەیاندووە: لە کۆبوونەوەکەدا بڕیاریان داوە "هەسەدە" وەک هێزێک، بەشێک دەبێت لە وەزارەتی بەرگریی حکوومەتی دیمەشق، دەشکرێت لە چوارچێوەی فەیلەق یان فەرماندەیی ناوچەی ڕۆژهەڵاتی وەزارەتەکەدا بێت و گفتوگۆکان هێشتا لە قۆناغی سەرەتادایە.

ئاماژەی بەوەش کرد، پرسی کێڵگە نەوتی و غازییەکانی باکووری ڕۆژهەڵاتی سووریا، بەشێک نییە لە گفتوگۆکان لەم قۆناغەدا، ڕەنگە لە خولەکانی داهاتوودا باسی لێبکرێت. بەڵام لیژنەی هاوبەش لە هەموو لایەنەکان پێکهێنراوە بۆ داڕشتنی پلان و میکانیزمی جێبەجێ کردن بۆ دڵنیابوون لە جێبەجێ کردنی بڕگەکان بەشێوەیێکی کاریگەر.

ئەو بەرپرسە هەسەدە باسی لەوەش کردووە،  ئەو هەنگاوە لە چوارچێوەی "یەکخستنی هەوڵەکان و بەهێزکردنی دەسەڵاتی نیشتمانیدا دێت، جگە لە کاراکردنەوەی دامەزراوە مەدەنی و خزمەتگوزارییەکانی سەر بە دەوڵەت لە باکوور و ڕۆژهەڵاتی سووریا". بۆ دڵنیابوون لە دابین کردنی خزمەتگوزارییە سەرەتاییەکان و باشترکردنی ئاستی ژیانی دانیشتوان.

ئەوەشی خستەڕوو، بڕیارەکانی ئەم دواییە دەبێتە هۆی بەرزکردنەوەی ئاستی یەکگرتنی هێزە ناوخۆییەکان لەگەڵ سوپای سووریا، هەروەها ئاسانکاری بۆ گەڕانەوەی ئاوارەکان و کۆچبەران بۆ شار و گوندەکانیان دەکات، لەگەڵ دڵنیابوون لە دابین کردنی هەلومەرجی گونجاو بۆ ژیانیان (مەبەستی لەو کەسانەیە کە بەهۆی ئۆپەڕاسیۆنەکانی تورکیا لە ناوچەکانی عەفرین، سەرێ کانیی و گرێ سپیی ئاوارە بوون).

لایخۆیەوە لەیلا قەرەمان، سەرۆکی ئەنجومەنی سووریا دیموکرات (مەسەدە) لە میانی چاوپێکەوتنەکەیدا لەگەڵ شه‌رق ئه‌لئه‌وسه‌ت باسی لەوەکردوە: "لە دوای ڕووخانی ڕژێمی پێشوو، دەرفەت لەبەردەست سووریاییەکاندایە، بۆ ئەوەی کۆ ببنەوە و بڕیاری چارەنووسساز بدەن سەبارەت بە ئایندەی وڵاتەکە لەم قۆناغە هەستیاردا کە هەموان دابەش بوون، بۆیە دەبێت کۆ ببینەوە و بەشداری گفتوگۆکان بکەین بۆ ئەوەی بگەینە وڵاتێک کە بۆ هەموو سووریایەکان بێت".

ناوبراو دەشڵێت، هیوادارن یەکێتی نەتەوەی پتەو ببێت و سەرجەم دەرگاکانی دیالۆگ لە سووریا بکرێنەوە بەبێ جیاوازی، هەروەها پێویستە پێناسەیێکی نوێی هەمەلایەنە بۆ سوورییەکان هەبێت، ئەوە جگە لە گرنگیدان بە حوکمڕانی داهاتووی وڵاتەکەش.

News Code 224904

Tags

Your Comment

You are replying to: .
captcha