بەپێی هەواڵی کوردپرێس، ڕوانگەی سووری بۆ مافەکانی مرۆڤ بڵاوی كردوه‌ته‌وه‌، هێزەکانی هاوپەیمانی نێودەوڵەتی، فڕۆکەیێکی بارهەڵگری پڕ لە کەرەستەی سەربازییان ڕەوانەی بنکەی خەراب ئەلجیر لە ڕمێلان لە باکووری حەسەکە کردووه‌ کە فڕۆکەکە چەکی پێشکەوتوو، سیستەمی ڕادار و ژمارەیەکی زۆری سەربازانی ئەمریکای هەڵگرتبوو.

ڕوانگەی سووری ئاماژەی بەوەش داوە، کاروانێکی ۵۰ بارهەڵگری چوونە ناو بنکەکە، کە ئۆتۆمبێلی زرێپۆش‌ و تۆپی قورس ‌و تەقەمەنی جۆراوجۆر و سندووقی داخراوو کەلوپەلی سەربازیی‌ و تانکی سووتەمەنییان پێبوو، کاروانەکە لەلایەن هێزەکانی ئاسمانی پاسەوانیان لێ دەکرا.

ڕاشیگەیاند، ۱۵ بارهەڵگری کە تانکی سووتەمەنی ‌و سندووقی داخراویان هەڵگرتبوو، چوونەتە ناو بنکەی قەسرک، ئەمەش لە چوارچێوەی جموجۆڵە سەربازییەکانی ئەمریکادا دێت لە ناوچەکە.