نه بنکێوه، نه ئه‌نجۆمه‌نێوه، نه مه‌ڵبه‌ندێوه نه کاناڵێوه ماهواره‌یی و نه ئه‌نیستیتۆیوه و نه ڕۆزنامێوه هه‌ورامی، هیچمان نیه‌ن تا نویسه‌ندێ و زه‌حمه‌تکێشێ زوان و ئه‌ده‌ب و فه‌رهه‌نگوو هه‌ورامی حمایه‌ت که‌رۆ و پاڵپه‌شتوو ڕه‌نج و ئاواتوو ڕۆشنویروو هه‌ورامی زوانێ بان.
ساڵه‌ی چوار کتێوێ به زوانی کوردی هه‌ورامی چاپێ مه‌وان، به‌ده‌ر جه نه‌وعوو نویسه‌یشان و سه‌تحه‌و نویسه‌که‌ی و ئه‌ده‌بی یان عێلمی بۆ، که‌س نیه‌ن پسانۆشان و بوانۆشانۆ و هه‌تا چوار باسێ یان چوار که‌لیمێ سه‌رشۆ بنویسۆ. ڕاسه‌ن ئینه ده‌ردێوه جه‌هانی و هه‌مه گیره‌نه به‌ڵام داخه‌که‌م له‌و ئێمه وه‌زعه‌کێ فره وێرانته‌ره‌نه.
هه‌ر شاروو دێهاته‌ی مه‌ڐیه‌ی بلقاسم‌به‌گێ هۆ‌رزه‌ینه‌و و وێ مه‌نمانانێ و هه‌ر که‌س په‌ی وێش ئێدعاو گه‌وره‌یی و وێ‌په‌نه‌زانای و ئۆستادی مه‌که‌رۆ، که چێش چوار که‌لیمێ قسێ ڕێک و پێکێشان نیه‌نێ په‌ی واته‌ی، تاکه‌تی خه‌ڵکیچ به عام و زه‌حمه‌تکێشه‌کێ فه‌رهه‌نگی به‌تایبه بواناشۆ و حه‌ز به گه‌شه و ئاوه‌ڎانی زوانی و ئه‌ده‌ب و زانستیمان که‌ران.
کابرا چوار سه‌فحێش به زوانی هه‌ورامی نه‌نویسه‌ن بیه‌ن زوان‌شناسوو هه‌ورامانی و یارۆ ئێدعاو غه‌زڵ نوو‌یسه‌ی هه‌ورامیش هه‌ن که چێش هێشتا پارامتروو غه‌زه‌ڵێ نمه‌زانۆ و هه‌تا نمه‌زانۆ چێشش واته‌ن و گه‌ره‌کش بیه‌ن چێش بنویسۆ و ...
ساڵه‌ی چوار به‌رنامێچ ئه‌ر مه‌گیریانێ مه‌نته‌قه‌و هه‌ورامانیه‌نه چه ئی دیم و چه ئه‌ودیم، بڕێوه ئه‌فرادێ خاسێ مه‌لانێ و ماباقیچ مه‌ڎیانێ. باند و باندبازی و ڕه‌فێق‌بازی و ئه‌من و ئه‌و که‌رده‌ی، که‌رده‌نش کاره‌ی هیچ کارێوه ڕێک و پێک جه ده‌ڤه‌روو هه‌ورامانی و جه شاروو شارووچکه‌کان نه‌لۆ ڕاوه. هه‌ر لا مه‌دیه‌ی بڕێوه بێکارێ هه‌نێ که گرد جه‌معێوه‌نه هه‌نێ و هیچ کارێوه‌یچ نمه‌که‌رانێ و به عه‌کس گرته‌ی و شۆخی که‌رده‌ی و قسه جۆڕ که‌رده‌ی مه‌ویارانێش و هه‌ورامانی بێ‌ده‌سه‌ڵات مازانێ. ئه‌گه‌ر قسێوه‌یچ که‌ری پسه گواڵه‌ی ده‌م واز مه‌که‌رانێ و مواڵیانه‌ی و ده‌م مه‌دڕانێره په‌یت و ئاوڕووت نمازانێ.
با به هه‌ورامی بنویسمێ و زوانی ئه‌ڎاییمان، پارێزنمێ. زوان و فه‌رهه‌نگی هه‌ورامی سروه‌توو سامانوو کولتوورو کوردیه‌ن و به بێ هه‌ورامی کولتوورو کوردی چێوه‌ش که‌مه‌ن. ئه‌گه‌ر چوار که‌لیمێ مه‌نویسمێ با به فارسی و ... نه‌نویسمێش تا زوانه‌که‌یمان جه قه‌یرانوو فۆتیای و جه به‌ین شیه‌ی ڕزگار که‌رمێ. به‌داخه‌وه سایت و کاناڵی خه‌وه‌ری هه‌ن چی شاره‌نه حازر نیه‌ن یه‌ک که‌لیمێوه هه‌ورامی په‌خش و بڵاو که‌رانێ، که چێش شاروو پاوه‌ینه (که لیانه‌و بنچینه‌و زوانی کوردی هه‌ورامیه‌ن) فێرێ ژیوای سه‌رده‌میانه‌ی بیێنێ و چی مه‌ردمیه یاواینێ ده‌سه‌ڵات و ...
چێش که‌رمێ و چه‌نی بلمێ په‌یش تا کارێوه به به‌رنامه به‌رمێ ڕاوه و پلانش په‌ی بنجێمێ و نه‌تیجه گێرمێ و سه‌مه‌رش بۆ په‌ی کۆمه‌ڵگه‌ی و تاک به تاکوو جامێعه‌ی و دماڕۆیچه‌نه بدیه‌یمێ په‌یش، شانازایش په‌نه که‌رمێ؟؟؟؟
سۆئالێ و پرسیارێ و داخێ فرێنێ ، نمه‌زانوو دماڕۆ زوانی ئه‌ڎایی چێشه‌ن و چێش مه‌وۆ...
Your Comment