بەپێی هەواڵی کوردپرێس، سیناتۆر کرس ڤان هۆڵن نوێنەری ویلایەتی مریلاند لە سیناتی ئەمریکا دەڵێت: "هێرشەکانی هێزەکانی سەر بە تورکیا بۆ سەر هاوبەشە کوردەکانمان لە سووریا ئاسایشی ناوچەکە و هەوڵەکان بۆ ڕێگرتن لە سەرهەڵدانەوەی داعش لاواز دەکات".

هاوکات، لینزی گراهام، سیناتۆری کۆمارییەکان ئاماژەی بەوەکرد: "پێویستە تورکیا ئاگربەست قبووڵ بکات و ناوچەیەکی داماڵراو لە چەک دابمەزرێنێ، ئەگەرنا یاسای سزاکان جێبەجێ دەکەین کە پشتگیری هەردوو حزبی کۆماری و دیموکراتی هەیە."

بەگوێرەی گۆڤاری هیڵ کە زمانحاڵی کۆنگرەی ئەمریکایە، ئەو سزایانەی سیناتۆرە ئەمریکییەکان باسی لێوە دەکەن بریتین لە سزای شەخسی ڕەجەب تەییب ئەردۆغان، سەرۆکی تورکیا و قەدەغەکردنی گەشتەکەی بۆ ئەمریکا و بەرپرسانی باڵای دیکەی حکوومەتی تورکیا، هەروەها سزاکان لەسەر کەرتی سەربازی و وزەی تورکیا، و لێکۆڵینەوە لە سەروەت و سامانی ئەردۆغان و ئاشکرا کردنی ئەگەری گەندەڵیی ناوبراو.