بەپێی هەواڵی کوردپرێس، فوئاد حوسێن، وەزیری دەرەوەی عێراق لە هەژماری خۆی لە تۆڕی کۆمەڵایەتیی X نووسیویەتی، لە نیویۆرک بەشداریی لە کۆبوونەوەی بەپەلەی هاوبەشی وڵاتانی ئەندامی کۆمکاری عەرەبی و رێکخراوی هاریکاریی ئیسلامی کرد.

وەزیری دەرەوەی عێراق جەخت لەوە دەکاتەوە، فراوانبوونی بازنەی جەنگ لە ناوچەکەدا لێکەوتەی مەترسیداری دەبێت، لە سەرووی هەموویانەوە ژینگەیەکی لەبار بۆ "رێکخراوە تیرۆریستییەکان دەڕەخسێنێت تاوەکوو دەست بە جموجووڵی تیرۆریستییان بکەنەوە".

شەڕ و پێکدادانی نێوان حیزبوڵڵا و ئیسرائیل لەدوای هەڵگیرسانی جەنگی غەززە لە ۰۷-۱۰-۲۰۲۳ دەستیپێکرد، بەڵام لە ۲۳ی ئەم مانگەوە بۆردوومانەکانی ئیسرائیل بۆ سەر باشووری لوبنان و بەیرووت چڕتر بوونەوە.

بەگوێرەی وەزارەتی تەندروستیی لوبنان، هەر لە چەند ڕۆژی ڕابردوودا زیاتر لە ۷۰۰ کەس لە لوبنان کوژراون و زۆربەیان سڤیلن.

سەرچاوە: تۆڕی میدیایی ڕووداو