بەپێی هەواڵی کوردپرێس، حوزەیرانی ساڵی رابردوو کێڵگەی کۆرمۆر کە دەکەوێتە ناوچەی ژێردەسەڵاتی یەکێتیی چەندجارێک مووشەکباران کرا، لەولاشەوە حەشدی شەعبی هێزی جووڵاند بۆ گرتنی خورمەڵە لەژێر ناوچەی دەسەڵاتی پارتیدا، ئەوەی حەشدی بەشێوەی سەربازی نەیکرد، لە پەرلەمانی عێراق بە بڕگەیەکی یاسایی ئەنجام درا، پارتی‌ و یەکێتیی لەسەر ئەم بابەتە بۆچوونیان جیاوازە، حکوومەت دەڵێ "قبوڵی ناکەین"، کەرتی نەوتی هەرێم بەبێ خورمەڵە‌و کۆرمۆر چییە؟

بەر لە دادگا، بوودجە حوکم دەدات

راپۆرتی لیژنەی دارایی پەرلەمانی عێراق سەبارەت بە بوودجەی ۲۰۲۳ پەسەند کرا، بڕگەی ۱۰ لە ماددەی ۱۴ی پرۆژە یاسای بوودجە کە لەلایەن لیژنەی داراییەوە پەسەند کراوە دەڵێ: "حکوومەتی فیدراڵ‌ و حکوومەتی هەرێم پابەندن بە رێگری کردن لە دەرهێنانی نەوت لە کێڵگەکانی کەرکووک ‌و نەینەوا لەلایەن حکوومەتی هەرێمەوە لە ئێستادا".

ئەم بڕگەیە بەواتای ئەوەدێت، حکوومەتی هەرێم چیتر بۆی نییە نەوت لە هەردوو کێڵگەی خورمەڵە‌و کۆرمۆر دەربهێنێت، چونکە هەردوو کێڵگەکە سەربە کۆمپانیای نەوتی باکۆرن لە کەرکوک و نەینەوا، ئەمە جگە لە راگرتنی کارکردنی حکوومەتی هەرێم لە هەندێک کێڵگە نەوتییەکانی پارێزگای نەینەوادا کە بە تانکەر نەوتەکەیان بۆ هەرێمی کوردستان دەگوازرێتەوە.

کۆمپانیای نەوتی باکوور لە دادگای فیدراڵی سکاڵای کردووە‌و داوای ئەم دوو کێڵگەیە لە حکوومەتی هەرێمی کوردستان دەکات، بەڵام بەرلەوەی دادگا بڕیار بدات، لیژنەی دارایی پەرلەمانی عێراق کە ۴ ئەندامی فراکسیۆنە کوردیەکانی تێدایە پارتی، یەکێتی، یەکگرتوو، ئەم دوو کێڵگەیەی لەدەستی حکوومەتی هەرێم سەندەوە، بەپێی زانیارییەکانی درەو، پارتی دیموکراتی کوردستان لەسەر ئەم بڕگەیە زۆر توڕەیە‌و هەڕەشەی کشانەوە لە حکوومەتی عێراق دەکات ئەگەر لە پەرلەمان ئەم بڕگەیە پەسەند بکرێت.

راگرتنی بەرهەمهێنانی نەوت لە هەردوو کێڵگەی خورمەڵە‌و کۆرمۆر چ واتایەکی بۆ هەرێمی کوردستان هەیە لە بواری نەوتدا ؟ بەرهەمی ئەم کێگانە چەندە‌و چ کاریگەرییەکی لەسەر پرۆسەی هەناردەی نەوتی هەرێم دەبێت ؟

خورمەڵە، شادەماری نەوتی هەرێم

بلۆکی خورمەڵە دەکەوێتە باشوری خۆرئاوای هەولێر، ئەم کێڵگەیە درێژکراوەی کێڵگەی کەرکوکە، لەلایەن کۆمپانیای کار گروپەوە سەرپەرشتی دەکرێت، ساڵی ۲۰۰۷ کەوتوەتە دەست حکوومەتی هەرێم.

ناوەڕاستی ئایاری ۲۰۲۲، کۆمپانیای نەوتی باکور کە سەربە وەزارەتی نەوتی عێراقە بەیاننامەیەکی بڵاوکردەوە، تێیدا باسی لەوەکرد، حکوومەتی هەرێم زیادەڕۆیی کردوەتەسەر کێڵگەی خورمەڵە.

حکوومەتی فیدراڵ بە وەرگرتنەوەی ئەم کێڵگەیە، لە شادەماری ئابووری حکوومەتی هەرێمی کوردستان دەدات، چوونکە بەپێی داتاکانی ۲۰۲۲ی وەزارەتی سامانە سروشتیەکان:

•    داهاتی فرۆشی نەوتی ئەم کێڵگەیە مانگانە ۵۲۵ ملیۆن دۆلار بۆ حکوومەتی هەرێم دابین دەکات، لەکاتێکدا تێکڕای داهاتی مانگانەی نەوتی هەرێم ملیارێک‌و ۲۶۰ ملیۆن دۆلارە.

•    لەکۆی ۴۲۱ هەزار بەرمیل نەوت کە رۆژانە هەرێم هەناردەی دەرەوەی دەکات بڕی ۱۷۵ هەزار بەرمیلی بەتەنیا لە کێڵگەی خورمەڵە بەرهەم دەهێنرێت، بەمەش رێژەی ۴۲%ی تێکڕای نەوتی هەناردەکراو و داهاتی نەوتی هەرێم لە خورمەڵەوە سەرچاوە دەگرێت.

بەڵام بەپێی راپۆرتێکی چەند رۆژی رابردووی ئاژانسی هەواڵی رۆیتەرز لەزاری سەرچاوەیەکی ئاگادارەوە بڵاویکردەوە" کێڵگەی خورمەڵە ئێستا رۆژانە ۵۰ هەزار بەرمیل بەرهەمدەهێنێت، ئەمەش کەمبونەوەیەکی زۆرە بەبەراورد بە مانگێک لەمەوبەر کە رۆژانە ۱۰۰ هەزار بەرمیل بووە‌و بەر لە راوەستانی بۆرییەکە کە رۆژانە ۱۳۵ هەزار بەرمیل بووە".

کەمبونەوەی بەرهەمهێنانی نەوت لە کێڵگەی خورمەڵە دوای ئەوە دێت بەرەبەیانی رۆژی ۲۵ی ئازاری ئەمساڵ، لەبەر رۆشنایی بڕیاری دادگای نێودەوڵەتی پاریسدا، تورکیا هەناردەی نەوتی هەرێمی لەرێگەی بۆرییەوە راگرت.

لەدەست­دانی کێڵگەی خورمەڵە زیانی گەورەتری دەبێت، چونکە بۆری نەوتی هەرێمی کوردستان بۆ تورکیا لە کێڵگەی خورمەڵەەوە دەستپێدەکات، رۆژانە ۹۰ هەزار بەرمیل نەوتی کەرکوک دەچێتە خورمەڵە‌و لەڕێگەی بۆری نەوتی کوردستانەوە رەوانەی تورکیا دەکرێت، داهاتی ئەم نەوتەی کەرکوک بۆ حکوومەتی عێراق بوو، بەڵام کۆمپانیای کار کرێی بۆرییەکە لە عێراق وەردەگرت‌و بۆ هەناردەکردنی هەر بەرمیلێک بڕی ۱۰ دۆلاری دەستدەکەوت، کە بەتێکڕا مانگانە داهاتەکەی ۲۷ ملیۆن دۆلار بوو، بەڵام ئەگەر کێڵگەی خورمەڵە بکەوێتە دەست کۆمپانیای نەوتی باکور، چیتر کۆمپانیای کاریش ئەم قازانجەی دەست ناکەوێت.

کۆمپانیای کار لە کێڵگەی خورمەڵە کار دەکات، کە گەورەترین کۆمپانیای خۆماڵییە لە بواری وزەدا، کۆمپانیاکە گرێبەستی لەگەڵ وەزارەتی سامانە سروشتییەکان هەیە بۆ پەرەپێدان لە کێڵگەکەدا. بەڵام جۆری گرێبەستی ئەم کۆمپانیایە هێشتا نەزانراوە، کۆمپانیای کار کاتێک کێڵگەی خورمەڵەی وەرگرتووە، کێڵگەیەکی ئامادە بووە‌و بەرهەمی هەبووە، زۆربەی بەرهەمی ئەم کێڵگەیە دەچێت بۆ پاڵاوتن لە پاڵاوگەی کار، بڕێکیشی بە تانکەر هەناردەی تورکیا دەکرێت.

بەمدواییە کە هەناردەی نەوتی هەرێم لەرێگەی بۆرییەوە بۆ تورکیا راوەستا، پێشنیازێک هەبوو بۆ ئەوەی کۆمپانیای کار ئاستی هەناردەی نەوت بۆ تورکیا بە تانکەر بەرزبکاتەوە.

کۆمپانیای کار، جگە لە کێڵگەی خورمەڵە، لەگەڵ کۆمپانیای روسنەفتی روسیدا خاوەندارێتی بۆری گواستنەوەی نەوتی هەرێمیش دەکات‌و پشکی ۴۰%ی لە بۆرییەکەدا هەیە، لەپاڵ ئەمەشدا کار خاوەنی گەورەترین پاڵاوگەی هەرێمی کوردستانە کە رۆژانە نزیکەی ۲۵ هەزار بەرمیل نەوت بۆ وەزارەتی سامانە سروشتییەکان دەپاڵێوێت‌و بەپێی زانیارییەکان، کۆمپانیای کار بە دوو هێندەی نرخ نەوت بۆ حکوومەتی هەرێم دەپاڵێوێت بە بەراورد بە عێراق.

کۆمپانیای کار واناسراوە، لە لوتکەی دەسەڵاتی زۆنی زەردەوە نزیکە، بۆیە بە لەدەستدانی کێڵگەی خورمەڵە، کۆمپانیاکە زیانی گەورەی دارایی بەردەکەوێت‌و ئەمەش بەواتای لێدان دێت لەیەکێک لە سەرچاوە بەهێزەکانی ئابوری پارتی دیموکراتی کوردستان.

کۆرمۆر، نەوتە پاکژەکەی یەکێتیی

کێڵگەی کۆرمۆر دەکەوێتە خۆرئاوای ناحیەی قادر کەرەم، ئەم ناحیەیە تاوەکو ساڵی ۱۹۷۶ سەربە قەزای خورماتوو بووە، واتا لەسەر پارێزگای کەرکوک ئەژمارکراوە، بەڵام لەو ساڵەدا خراوەتەسەر پارێزگای سەڵاحەدین، ساڵی ۱۹۸۷ جارێکی تر ناحیەی قادر کەرەم لەڕووی ئیدارییەوە دەستکاری کراوەو خراوەتەسەر قەزای چەمچەماڵ.

کۆرمۆر تاوەکوو ساڵی ۲۰۰۳‌و بەر لە رووخانی رژێمی سەددام لەژێر کۆنترۆڵی حکوومەتی عێراقدا بوو، دوای روخانی سەددام کێڵگەکە کەوتەوە دەست حکوومەتی هەرێم، نیسانی ۲۰۰۷ حکوومەتی هەرێم گرێبەستی لەگەڵ هەردوو کۆمپانیای دانەگازو کریسنت پتریۆلیۆمی ئیماراتی ئیمزا کرد، گرێبەستەکە مافی دەرهێنانی نەوت‌و گازی لە هەردوو بلۆکی کۆرمۆرو چەمچەماڵی بەو دوو کۆمپانیایە بەخشی، لە ۲۰۱۵دا غاز لە کێڵگەکە بەرهەمهێنرا، بە بۆری گواسترایەوە بۆ وێستگەی کارەبای چەمچەماڵ‌و هەولێر.

بەرهەمی ئێستای کێڵگەکە بەمشێوەیە:

. گازی سروشتی: رۆژانە ۴۵۲ ملیۆن پێ سێجا

. کۆندێنسەیت: رۆژانە ۲۲ هەزار بەرمیل، بەتانکەر دەگوازرێتەوە بۆ وێستگەی خورمەڵە و تێکەڵ دەکرێت لەگەڵ نەوتی هەرێمی کوردستان بەمەبەستی بەرزکردنەوەی کوالیتییەکەی

. گازی شل LPG: بڕی ۱۰۵۰ تۆن، ئەمە داناگاز خۆی دەیفرۆشێت بە کۆمپانیاکانی ناوخۆ، بۆ هەر تەنێک بڕی ۳۱۵ دۆلار وەردەگرێت، کۆمپانیای ساوس کوردستان دەیکڕێت‌و دەیگوازێتەوە. 

بەپێی ئەوەی لیژنەی دارایی پەرلەمانی عێراق لە پرۆژەی بوودجەی ۲۰۲۳دا پەسەندی کردووە، دەبێت حکوومەتی هەرێم بەرهەمهێنانی نەوت لەم کێڵگەیە رابگرێت، بەڵام بڕگەکە ئاماژەی بە غاز نەکردووە.

نەوتی ئەم کێڵگەیە کۆندێنسەیت لەماوەی رابردوودا یەکێک لە چەکە بەهێزەکانی یەکێتیی بوو دژ بە پارتی، چونکە بەم نەوتە کوالیتی نەوتی کێڵگەکانی تری هەرێم بەرزدەکرایەوە، کە زۆرینەیان لەناوچەی ژێر دەسەڵاتی پارتیدا بوون، واتا بە راگرتنی بەرهەمهێنانی نەوت لە کێڵگەی کۆرمۆر چیتر یەکێتیش ئەم کارتەی بەدەستەوە نامێنێت، بەڵام ئەمە لەکاتێکدا روودەدات کە پرۆسەی نەوتی هەرێم بە گشتی لەژێر کۆنترۆڵی حکوومەتی هەرێمدا نامێنێت‌و دەکەوێتە دەست حکوومەتی فیدراڵ.

کێڵگەی کۆرمۆر کە گەورەترین کێڵگەی غازی هەرێمی کوردستان‌و پێداویستی غازی ماڵان لەناوخۆو  وێستگەکانی کارەبا دابین دەکات، بەهەمان شێوە کێشەی لەسەرەو عێراق داوای دەکات.

شوباتی ۲۰۲۲، نێچیرڤان بارزانی سەرۆکی هەرێمی کوردستان بەشێوەیەکی کتوپڕ گەیشتە ئەنکەرەو وێنەیەکی لەگەڵ رەجەب تەیب ئەردۆغان سەرۆکی تورکیا بڵاوکرایەوە، دوای دیدارەکەی، ئەوکات ئەردۆغان لەرێگەی گەشتێکیدا بۆ ئۆکرانیا بە رۆژنامەوانانی وت: لەگەڵ نێچیرڤان بارزانیدا لەبارەی هەناردەکردنی غازی هەرێمی کوردستانەوە بۆ تورکیا گفتوگۆم کرد.

ئەم قسەیەی ئەردۆغان بەس بوو بۆ ئەوەی دواتر هەرێمی کوردستان بکەوێتە ژێر فشارێکی بەهێزی حکوومەتی ناوەندی عێراق‌و ئێرانەوە، بەتایبەتیش لەو رۆژانەدا بوو کە بەڕێوەبەری کۆمپانیای دانەغاز لێدوانێکی داو وتی: دەتوانین بە غازی چەمچەماڵ سوتەمەنی بۆ عێراق‌و تورکیاش دابین بکەین.

هەر لەو مانگەدا کە نێچیرڤان بارزانی گەشتەکەی کرد بۆ تورکیا شوبات، دادگای باڵای فیدراڵی عێراق بەشێوەیەکی کتوپڕ‌و دوای ۱۰ ساڵ سڕکردنی، بڕیاری خۆی لەبارەی سکاڵایەکی وەزارەتی نەوتی عێراقەوە یەکلا کردەوە‌ و یاسای نەوت‌و غازی هەرێمی کوردستانی هەڵوەشاندەوە‌و حوکمیدا بەوەی دەبێت هەرێم نەوت‌و غازی خۆی رادەستی بەغداد بکات.

ئیتر لەدوای ئەم بڕیارەوە، حکوومەتی فیدراڵ زیاتر دەستی کرایەوە تا ئەوەی سکاڵاکەی دادگای پاریسی دژی تورکیا لە بەرژەوەندی خۆی یەکلاکردەوە‌و بەمەش بەتەواوەتی جڵەوی نەوت‌و غازی هەرێمی کوردستانی کرد، واتە ئەوەی ئێستا لە پرۆژەیاسای بوودجەدا روودەدات، بەرەنجامی ئەم گۆڕانکارییانە بووە کە تێیدا پێگەی هەولێر لاواز‌و پێگەی بەغداد بەهێزتر بوو.

ئازاری ۲۰۲۲ دوای بڕیارەکەی دادگای باڵای فیدراڵی، ئێران ماڵەکەی شێخ باز سەرۆکی کۆمپانیای کاری لە هەولێر موشەکباران کرد، چونکە کۆمپانیاکەی شێخ باز ئەرکی پەرەپێدانی هێڵی بۆری هەناردەی غازی کۆرمۆری بۆ تورکیا پێ سپێردرا بوو، ئەوکات ئاژانسی هەواڵی رۆیتەرز لەزاری بەرپرسی عێراق‌و ئەمریکی‌و تورکییەوە رایگەیاند، لەماڵەکەی شێخ بازدا گفتوگۆ کراوە لەبارەی ناردنەدەرەوەی غازی کوردستان بۆ تورکیا‌و ئەوروپا، بەرپرسانی ئەمریکی‌و ئیسرائیلی بەشداربوون لە کۆبونەوەکەدا، ئەمە ئێران توڕە کردووە، چونکە ئێران خۆی هەناردەکاری غازە بۆ عێراق‌و تورکیا‌و نایەوێت هەرێمی کوردستان ببێت بە بەدیلی ئەو لە ناوچەکەدا.

غازی کێڵگەی کۆرمۆر لەنێوان دوو پرۆژەدا گیری خواردووە، یەکەمیان پرۆژەی پارتییە بۆ هەناردەکردنی بۆ تورکیا، دووەمیان پرۆژەی یەکێتییە کە بریتییە لە راکێشانی غازەکە بە بۆری بۆ ماڵان‌و کارگەکان لەناوخۆدا.

ناوەڕاستی ۲۰۲۲ بڕیاربوو کۆمپانیای کار بچێتە کێڵگەی کۆرمۆرو دەست بەکارکردنی خۆی بکات بۆ راکێشانی بۆری غاز، هەندێک لەبەرپرسانی یەکێتیی ئەوکات باسیان لەوە دەکرد، راکێشانی بۆرییەکە بۆ گواستنەوەی غازە بۆ وێستگەی کارەبای دهۆک، چونکە دابینکردنی سوتەمەنی ئەم وێستگەیە خەرجییەکی زۆری خستوەتەسەر شانی حکومەت، بەڵام هەندێکی تر گومانیان هەبوو، دەیانوت" راکێشانی بۆرییەکە بۆ هەناردەکردنی غازی کۆرمۆرە بۆ تورکیا".

ئەوکات ئەنجومەنی ئاسایشی هەرێمی کوردستان نوسراوێکی بۆ ئاسایشی سلێمانی کردبوو، داوای کردبوو ئاسانکاری بکەن بۆ کارکردنی کۆمپانیای کار، بەڵام یەکێتیی رێگری کرد.

رۆژی ۲۸ی نیسانی ۲۰۲۲ بافڵ تاڵەبانی سەرۆکی یەکێتیی لە هەولێر لەگەڵ نوێنەری نێردەی دیپلۆماسی وڵاتان‌و رێکخراو ئاژانسە نێودەوڵەتییەکاندا کۆبووەوە، لەم کۆبونەوەیەدا لەبارەی پرسی هەناردەکردنی غازی کوردستانەوە وتی:" روون‌و ئاشکرا رایدەگەیەنم، دەبێت بەسەر لاشەی بافڵ جەلال تاڵەبانیدا بۆری غاز هەناردەی دەرەوە بکرێت".

ئەوەی حەشد نەیکرد، بوودجە دەیکات !

حکوومەتی فیدراڵی عێراق گەورەترین کێڵگەی غازی هەرێمی کوردستان کە کێڵگەی کۆرمۆرە لە سنوری دەسەڵاتی یەکێتی‌و گەورەترین کێڵگەی نەوتی هەرێم کە کێڵگەی خورمەڵەیە لە سنووری دەسەڵاتی پارتی، بە هی خۆی دەزانێت.

حوزەیرانی ۲۰۲۲ چەندجارێک بە کاتیۆشا هێرش کرایەسەر کێڵگەی کۆرمۆر، پەنجەی تۆمەت لەم هێرشانەدا بۆ هێزەکانی حەشدی شەعبی راکێشرا.

لەو رۆژانەدا کە موشەکەکان ئاڕاستەی کۆرمۆر کران، بافڵ تاڵەبانی سەرۆکی یەکێتی چووە تەوێڵە‌و لە باخەکەی جەمیل هەورامی چەند بەرپرسێکی ئێرانی بینی، ئەم گفتوگۆیە هێشتا بەنهێنی ماوەتەوە، دیارنییە ئایا باسی هێرشەکانی کۆرمۆرو خورمەڵەی تێدا کراوە یاخود نا.

دوابەدوای هێرشەکانی کۆرمۆر، هێزەکانی حەشدی شەعبی خۆیان کۆکردەوە بۆ کۆنترۆڵکردنی کێڵگەی خۆرمەڵە، بەوپێیەی ئەم کێڵگەیە دەکەوێتە ناوچەی جێناکۆکی نێوان هەرێمی کوردستان‌ و حکوومەتی فیدراڵ، دوان لە گەورە دەسەڵاتدارانی ناو حەشد کە هەریەکە لە هادی عامری‌و قەیس خەزعەلی بوون، ئەوکات جەختیان دەکرد لە کۆنترۆڵ کردنی خورمەڵە، ئەمەشیان بە راشکاوی بە چەند بەرپرسێکی کورد وتبوو.

رۆژی ۲۳ی حوزەیرانی ۲۰۲۲ چەند گروپێکی حەشدی شەعبی هێزیان بەرەو نزیکی مەخمورو خۆرمەڵە جوڵە پێکرد، شەوەکەی مەسرور بارزانی سەرۆکی حکوومەتی هەرێم بەیاننامەیەکی دەرکردو رایگەیاند "وەزیرانی کاروباری پێشمەرگەو ناوخۆم راسپاردووە هەموو رێکارێکی پێویست بگرنەبەر بۆ پاراستنی ژێرخانی گشتی‌و دامەزراوەکانی نەوت‌و گاز.. رێککەوتووین لەسەر ناردنی هێزی زیاتر بۆ ناوچەکە. لە ڕۆژانی داهاتووشدا ڕێکاری زیاتر دەگرینەبەر".

دۆخەکە گەیشتە ئاستی ئەوەی شەوی ۲۳ی حوزەیران، مەسروور بارزانی پەیوەندی بە برێت مەکگۆرک رێکخەری کۆشکی سپی بۆ رۆژهەڵاتی ناوەڕاست‌و باکوری ئەفریقاوە کرد‌و بڕیاریشیدا ئەنجومەنی ئاسایشی نێودەوڵەتی لەبارودۆخەکە ئاگادار بکاتەوە، لەسەر زەویش مەسروور هێزێکی لەشکری گوڵان‌ و زێرەڤانی بەرەو کێڵگەی خورمەڵە جووڵە پێکرد.

ئەگەر حەشد دەستی بەسەر کێڵگەی خورمەڵەدا بگرتایە، جگە لەوەی شادەماری ئابوری هەرێمی دەبڕێت، بوونی هێزەکانی لەم ناوچەیەدا لەڕووی ئەمنییەوە دەبوو بە مەترسی لەسەر دەسەڵاتی هەولێر، چوونکە خورمەڵە تەنیا ۲۵ کیلۆمەتر لە هەولێرەوە دوورە.

ئەوەی حەشدی شەعبی نەیکرد، ئێستا لیژنەی دارایی پەرلەمانی عێراق بەبێ ناردنی هێزو لەرێگەی زیاد کردنی بڕگەیەک بۆ رێککەوتنی هەرێم ‌و حکوومەتی فیدراڵ کردوویەتی ‌و هەرێم پابەند دەکات کێڵگەکە رادەستی بەغداد بکاتەوە.

ئەمە هۆکارەکەیە کە حکوومەتی هەرێم راگەیەندراوێکی بڵاو کردەوە ‌و دەڵێ: "ئەو گۆڕانکاریانەی لەلایەن بەشێک لە ئەندامانی لیژنەی دارایی ئەنجومەنی نوێنەرانی عێراق، لە ڕێککەوتی ۲۰۲۳/۵/۲۵ دژی هەرێمی کوردستان، لەسەر پرۆژە یاسای بوودجە ئەنجام دران، نادەستوریین‌ و دژی ڕێککەوتنی حکوومەتی هەرێم ‌و حکوومەتی فیدراڵیە و هەروەها دژی پرەنسیپەکانی ڕێککەوتنی حکوومەتی ئیدارەی دەوڵەت ‌و بەرنامەی ئەو کابینەیەیە کە لە ئەنجومەنی نوێنەران دەنگیان لەسەر دراوە.  ئێمە وەک حکوومەتی هەرێم، بەهیچ شێوەیەک، ئەم ستەمکاری ‌و پێشێل کردنی مافەکانی خەڵکی کوردستان قبووڵ ناکەین ‌و پابەندی هیچ بڕیارێکی تریش نابین جگە لەو  ڕێککەوتنەی پێشتر لەگەڵ حکوومەتی سوودانی کراوە".