کوردپرێس:
محه‌مه‌د عه‌لی حه‌كیم له به‌غدا به جیا له‌گه‌ڵ هه‌ر یه‌ک له جۆن وێڵكس باڵیۆزی به‌ریتانیا و یورخن موله‌ر هه‌ڵسووڕێنه‌ری كاروباری باڵیۆزخانه‌ی ئه‌ڵمانیا و جان نۆبڵ هه‌ڵسوڕێنه‌ری كاروباری باڵیۆزخانه‌ی فه‌ڕه‌نسا كۆ بووه‌وه و پێی ڕاگه‌یاندوون که حكوومه‌تی عێراق هه‌موو بژارده دیپلۆماتی و یاسایی كردووه‌ته كاری له‌پێشینه‌ی بۆ ئه‌وه‌ی ڕێگری بكات له ده‌ستوه‌ردان له كاروباری عێراقدا.
ناوبراو باسی له‌وه کردووه که له ڕێگه‌ی نه‌ته‌وه یه‌كگرتووه‌كان و ئه‌نجومه‌نی ئاسایش هه‌نگاوی پێویست ده‌نێن و ڕێوشوێنی پێویست و ته‌واوی ڕێكاره دیپلۆماسییه‌كان ده‌گرنه‌به‌ر بۆ ئه‌وه‌ی به‌ره‌نگاری هه‌ر کارێک ببنه‌وه كه پێشێلی سه‌روه‌ریی عێراق بكات.
له کۆبوونه‌وه‌که‌دا وه‌زیری ده‌ره‌وه‌ی عێراق خواستی خۆی نیشان دا بۆ هاوكاری كردن له‌پێناو به‌دیهێنانی ئاسایش و ئاشتی له ناوچه‌كه‌دا و جه‌ختی كرده‌وه: عێراق له‌سه‌ر بنه‌مای به‌رژه‌وه‌ندیی هاوبه‌ش و بۆ به‌ره‌نگاربوونه‌وه‌ی مه‌ترسییه هاوبه‌شه‌كان په‌یوه‌ندییه‌كانی له‌گه‌ڵ وڵاتاندا داده‌مه‌زرێنێت.
محه‌مه‌د عه‌لی حه‌كیم ئه‌وه‌شی به نوێنه‌ره دیپلۆماتییه‌كان وتووه: "له‌م قۆناغه‌ی ئێستادا ناوچه‌كه ڕووبه‌ڕووی به‌ره‌نگاری بووه‌ته‌وه و پێویسته له‌سه‌ر هه‌موان بۆ هێوركردنه‌وه‌ی ڕه‌وشه‌كه په‌نا بۆ گفتوگۆ ببه‌ن و ڕێگه‌ش نه‌درێت ده‌ست وه‌ردرێته كاروباری وڵاتانه‌وه".
سه‌رچاوه: ماڵپه‌ڕی به‌غداد ئه‌لیه‌وم
کۆدی هه‌واڵنێر: 60103
Your Comment