«سولەیمان ئیلیاس» سەرۆکی ناوەندی توێژینەوە ستراتێژیکەکانی فورات لە گفتوگۆ لەگەڵ کوردپرێسدا ئاماژەی دا بە هەڕەشە نوێکانی تورکیا دژ بە کوردستانی سووریا و شەنگال پاش سەردانەکەی وەزیری بەرگریی تورکیا بۆ بەغدا و هەولێر و وتی: ئەوەی کە تورکیا بیهەوێت لە ئێستادا هێرشێکی دیکە دژ بە شەنگال و دێرک ئەنجام بدات ئەو مۆڵەتەی پێنادرێت چوونکە نەخشەی سیاسی ناوچەکە و ئەکتەرانی سیاسی دیکە ئەو مۆڵەتە بە تورکیا نادەن.

ناوبراو وتی: ڕەنگە تورکیا بتوانێت لەڕێگای هێزەکانی سەربە وڵاتەکەیەوە لە هەندێک ناوچەدا پیلان بگێڕێت بەڵام توانای نییە لەشکەرکێشیێکی دیکە ئەنجام بدات.

سەرۆکی ناوەندی توێژینەوە ستراتێژیکەکانی فورات جەخت دەکاتەوە: پاش گۆڕانکارییە سیاسییەکان و دەست بەکار بوونی سەرۆکی نوێی ئەمریکا، سیاسەتەکانی ویلایەتە یەکگرتووەکان لە ناوچەکەدا و لە سووریا دەگەڕێتەوە بۆ پێش سەدەمی پێش ترەمپ.

سولەیمان ئیلیاس پێشتر بە کوردپرێسی ڕاگەیاندبوو لە زۆر ناوچەدا هەن کە ئەردۆغان هەڵمەتی سەربازی دەست پێکردووە و شکستی هێناوە و ئەمەش زیاتر کردنی بەرەیێکی دیکەی شەڕ بۆ سەرۆکی تورکیا دژوار دەکات.

ناوبراو زیاتر وتی: دەوڵەتی ئەمەریکا و بەڕێوەبەرایەتیی خۆسەر گرێبەستێکی نەوتیی 25 ساڵەی واژۆ کردووە و ئەمەش بەم مانایەیە کە ئەمەریکا نایەوێت بەم زووانە لە سووریا بکشێتەوە تەنانەت ئەگەر پرسی سووریا چارەسەر بکرێت.

سەرۆکی ناوەندی لێکۆڵینەوە ستراتێژیکەکانی ناوچەی فورات ئاشکرای کرد: ئەمەریکا ستراتێژیێکی درێژخایەنی بۆ ناوچەکە هەیە و بە هاتوچوونی سەرۆک کۆمارەکان گۆڕانکاری لە سیاسەتەکانی ئەمەریکا لە ناوچەکەدا ڕوونادات.

دکتۆر ئیلیاس وتیشی: ئەمەریکا بەبۆنەی کوردەوە ناهاتۆتە سووریا و بە دڵنیایەوە لەدوای بەرژەوەندییەکانی خۆیدایە و لەم نێوانەشدا کوردەکان سیاسەتی سەربەخۆی خۆیان پەیڕەو دەکەن.

ناوبراو وەبیری هێنایەوە: کەمتر لە 30لەسەدی خاکی سووریا لە ژێر کونترۆڵی هێزەکانی سووریای دیموکراتیکدایە و ئەمەش بەم مانایەیە کە لە کونترۆڵی ئەمەریکادایە بۆیەش تورکیا بەهۆی پشتیوانیی ئەمەریکا و ئەوورووپا لە کوردی سووریا، تووشی هەڵەیێکی دیکە نابێت.

کۆدی هەواڵنێر: 60113