بەپێی هەواڵی کوردپرێس، جووتیار عادل وته‌بێژی حکوومه‌تی هه‌رێم له کۆنگره‌یه‌کی ڕۆژنامه‌وانیدا ئاشکرایکرد، یه‌کشه‌ممه‌ی داهاتوو جارێکی دیکه وه‌فدى هه‌رێم بۆ ئه‌نجامدانی گفتوگۆ سه‌ردانی به‌غدا ده‌کات و ڕێککه‌وتنی سه‌ره‌تاییش له‌باره‌ی یاسای بودجه کراوه.
وته‌بێژى حکوومه‌ت ئه‌وه‌شى ڕوون کرده‌وه، "یه‌کێک له کۆبوونه‌وه‌کانی وه‌فدى هه‌رێم له‌گه‌ڵ ده‌سته‌ی به‌ڕێوه‌بردنی ده‌روازه سنوورییه‌کان بووه، له‌و کۆبوونه‌وه‌یه‌دا گفتوگۆ له‌سه‌ر چۆنێتی هه‌ماهه‌نگی کردن و به‌ڕێوه‌بردنی ده‌روازه سنوورییه‌کان کراوه، هه‌ر له‌و کۆبوونه‌وه‌یه‌دا باس له هه‌ندێک ده‌روازه کرا، که له‌لایه‌ن حکوومه‌تی هه‌رێمه‌وه فه‌رمین، به‌ڵام لای حکوومه‌تی عێراق نافه‌رمین، بۆیه گفتوگۆ کراوه چۆن ئه‌و ده‌روازانه بکرێنه فه‌رمی و له‌وباره‌وه هه‌نگاوی باش نراوه و ڕێککه‌وتنی سه‌ره‌تایی کراوه".
به‌وته‌ى جووتیار عادل: "ڕێککه‌وتنی سه‌ره‌تایی له‌باره‌ی پڕۆژه‌یاسای بودجه‌ی 2023ی عێراق له‌نێوان حکوومه‌تی هه‌رێم و عێراقیش کراوه و ئه‌رکه‌کانی هه‌ردوولا دیاری کراون، به‌ڵام هه‌ندێک ورده‌کاری ماون پێویسته گفتوگۆیان له‌سه‌ر بکرێت، بۆ ئه‌وه‌ی مافه‌کانی هه‌رێم پشتگوێ نه‌خرێن".
Your Comment