ئه‌مڕۆ چوارشه‌ممه‌ 29ی جۆزه‌ردان به‌رانبه‌ر به‌ 19ی حوزه‌یرانی 2019 زاهد فه‌یزه‌ به‌ڕێوه‌به‌ری ئیداره‌ی ڕاگه‌یاندنی تیمی به‌رگریی شارستانی له‌ بۆکان به‌ هه‌واڵنێری کوردپرێسی ڕاگه‌یاند: کاتژمێر 12:20 خوله‌کی نیوه‌شه‌و په‌یوه‌ندییێک به‌ 125وه‌ کرا و هه‌واڵی ته‌قینه‌وه‌یێک له‌ خانووی یه‌ک له‌ هاووڵاتییانمان پێگه‌یشت بۆیه‌ ده‌ستبه‌جێ دوو تیمی فریاکه‌وتن و ئاگرکوژاندنه‌وه‌ نێردرانه‌ شوێنی ڕووداوه‌که‌.

فه‌یزه‌ گوتیشی: زیاتر له‌ 8 فه‌رمانبه‌ری به‌رگریی شارستانی له‌ ماوه‌ی 70 خوله‌کدا توانییان ئاگره‌که‌ بکوژێننه‌وه‌ و بریندارانی ڕووداوه‌که‌ش ڕزگار بکه‌ن.

ناوبراو زیادی کرد: ڕووداوه‌که‌ 19 برینداری لێکه‌وته‌وه‌ که‌ تیمه‌کانی فریاکه‌وتن ئه‌و بریندارانه‌یان گه‌یانده‌ نه‌خۆشخانه‌ی شه‌هید قولی‌پوور به‌ڵام پێنج که‌سیان به‌هۆی برینی قووڵه‌وه‌ نێردرانه‌ ورمێ.

به‌ڕێوه‌به‌ری ئیداره‌ی ڕاگه‌یاندنی به‌رگریی شارستانیی بۆکان ڕاشی‌گه‌یاند: تا ئێستا هۆی ته‌قینه‌وه‌که‌ ده‌رنه‌که‌وتووه‌ و چاوه‌ڕوانی ڕای پسپۆڕان و کارناسان ده‌که‌ین.

کۆدی هه‌واڵنێر: 60103