بەپێی هەواڵی کوردپرێس، شاسوار عەبدولواحید سەرۆکی جووڵانەوەی نەوەی نوێ و سەرۆکی هاوپەیمانی لەپێناو خەڵک لە پەیامێکی ڤیدیۆییدا رایگەیاند: بڕیاربوو تاوەکوو کۆبوونەوەی داهاتووی پەرلەمان چەند خاڵێکی رێککەوتنە ١٧ خاڵییەکە جێبەجێبکرێت، وەک دابەزاندنی نرخی بەنزین بەڵام تاوەکوو ئێستا جێبەجێ نەکراوە، دەشڵێت، ئەگەر تاوەکوو سبەی چوارشەممە جێبەجێنەکرێن؛ ئەوا بەشداری کۆبوونەوەی سبەینێی پەرلەمان ناکەین.

ئاماژەى بەوەشکردوە، لە پێناو بەرژەوەندی خەڵکدا ئامادەن پەرلەمان پەکبخەن و بەرژەوەندی هاوڵاتیان لە چیدابێ ئەوە دەکەن، داواش لە پەرلەمانتارانی نەوەی نوێ لە بەغدا دەکات، ئەگەر بەرژەوەندی هاوڵاتیان وایپێویستکرد، ئەوا دانیشتنی پەرلەمان پەکبخەن تاوەکوو ئەو کاتەی وەڵامتان دەدرێتەوە.

سەرۆکى نەوەى نوێ باسى لەوەشکردوە، تاوەکوو ئەو لایەنە عێراقیانە هەنگاوێک نەنێن بۆ خزمەتکردنی هاوڵاتیان، ئەوا مەچنە ناو هۆڵی پەرلەمانەوە.

شاسوار عەبدولواحید لە پەیامەکەیدا ئاماژەی بەوەشکردووە، "ئێمە تاکە هێزین خاوەنی بڕیاری خۆمانین و دەتوانین بایکۆت بکەین یان بڕیاربدەین بچێنە ژوورەوە".