کوردپرێس:
جه‌بار یاوه‌ر ئه‌مینداری گشتیی وه‌زاره‌تی پێشمه‌رگه به SNNی ڕاگه‌یاند: سه‌رباری ڕاگرتنی مه‌شقی ئه‌مریکا به هێزی پێشمه‌رگه به‌ڵام پڕۆژه‌ی چه‌کسازی و مۆدێڕن‌کردنه‌وه‌ی ئه‌و هێزانه له‌لایه‌ن ئه‌مریکاوه به‌رده‌وامه.
جه‌بار یاوه‌ر ڕاشی‌گه‌یاند: "ئه‌مریکا پڕۆژه‌یێکی نوێ بۆ یه‌کخستنی سیسته‌می گه‌یاندنی وه‌زاره‌تی پێشمه‌رگه ئاماده کردووه و پڕۆژه‌که‌ش بۆ ڕێکخستنه‌وه‌ی سیسته‌می په‌یوه‌ندی کردنی ھێزه‌کانی پێشمه‌رگه‌یه".
ناوبراو ئه‌وه‌شی ڕوون کرده‌وه: "وه‌زاره‌تی پێشمه‌رگه پێشتر جۆره‌ھا سیسته‌می پهیوهندیکردنی بۆ ھێزه‌کانی پێشمه‌رگه و وه‌زاره‌ت له‌گه‌ڵ سه‌رجه‌م یه‌که‌کانی خۆی ھه‌بووه و ئه‌مه‌ش جه‌نجاڵیه‌کی له په‌یوه‌ندی کردندا دروست ده‌کرد به‌ڵام له ڕێگه‌ی یه‌کخستنی پڕۆژه‌ی گه‌یاندن ته‌نھا سیسته‌می بێ‌ته‌ل به کار ده‌ھێنرێت و ئاسانکاری بۆ سیسته‌می په‌یوه‌ندی کردن ده‌کات".
به‌رپرسه باڵاکه‌ی وه‌زاره‌تی پێشمه‌رگه ئاشکرای کرد: "له ئێستادا ئه‌مریکا ده‌ستبه‌کار بووه و سه‌رجه‌م ئامێره بێته‌له‌کان بۆ وه‌زاره‌ت دابین ده‌کات، ھاوکات بورج داده‌نێت و خولی ڕاھێنان بۆ به‌کارھێنانی ئامێره‌کان بۆ ھێزه‌کانی پێشمه‌رگه ده‌کاته‌وه".
جه‌بار یاوه‌ر ئه‌وه‌شی وت: "ئه‌گه‌رچی ئه‌مریکا بڕیاری داوه به شێوه‌یێکی کاتی مه‌شق و ڕاھێنانه‌کانی به پێشمه‌رگه بوه‌ستێنێت به‌ڵام کارکردنی له‌م پڕۆژه‌یه‌دا به‌رده‌وامه".
کۆدی هه‌واڵنێر: 60103
Your Comment