به‌پێی هه‌واڵی کوردپرێس، ڕۆژی یه‌کشه‌ممه (27/1/2019) جین هینسین پلاسگارت نێرده‌ى تایبه‌تى سکرتێرى گشتیى نه‌ته‌وه یه‌کگرتوووه‌کان له عێراق و ریکاردۆ رۆدریگر به‌رپرسی ئۆفیسى یۆنامى له هه‌رێمى کوردستان و وه‌فدێکى یاوه‌رى سه‌ردانى مه‌کۆى سه‌ره‌کى بزووتنه‌وه‌ى گۆڕانیان کرد و له‌لایه‌ن محه‌مه‌د تۆفیق ڕه‌حیم سکرتێرى کاروبارى ژووره‌کانى بزووتنه‌وه‌ى گۆران و ڕێکخه‌ر و ئه‌ندامانى ژوورى په‌یوه‌ندییه دیپلۆماسییه‌کانه‌وه پێشوازیان لێکرا.
له کۆبوونه‌وه‌که‌دا گفتوگۆ کرا له‌سه‌ر پرسی پێکهێنانى کابینه‌ى نوێی حکوومه‌ت و نێرده‌ى تایبه‌تى نه‌ته‌وه یه‌کگرتوووه‌کان نیگه‌رانیى خۆی نیشان دا له دواکه‌وتنى پێکهێنانى کابینه‌ى نوێی حکوومه‌ت و ڕای‌گه‌یاند: ده‌نگده‌ران بۆیه ده‌نگیان داوه بۆ ئه‌وه‌ى حکوومه‌تێکى نوێ نوێنه‌رایه‌تى ئه‌وان بکات و داوای کرد په‌له بکرێت له پێکهێنانى حکوومه‌ت.
له به‌رامبه‌ردا وه‌فدى گۆڕان بۆچوونى خۆیان له‌وباره‌یه‌وه خسته‌ڕوو و ڕایان‌گه‌یاند که بزووتنه‌وه‌که پشتیوانى له دروست بوونى حکوومه‌تێکى به‌هێزى خزمه‌تگوزار ده‌کات که کار بۆ باش کردنى ژیانى هاووڵاتییان بکات.
سه‌رچاوه: سبه‌ی
کۆدی هه‌واڵنێر: 60103
Your Comment