به‌پێی هه‌واڵی کوردپرێس، ڕۆژی هه‌ینی 18ی کانوونی دووهه‌می 2019 حامی ئاكسۆی له‌ میانی كۆنگره‌یێكی ڕۆژنامه‌وانیدا له‌ وه‌زاره‌تی ده‌ره‌وه‌ ئاماژه‌ی به‌وه‌ دا كه‌ هه‌وڵی پته‌وتركردنی په‌یوه‌ندییه‌كانیان ده‌ده‌ن له‌گه‌ڵ عێراق و به‌ بیری هێنایه‌وه‌ گه‌وره‌ترین په‌یماننامه‌ توركیا له‌گه‌ڵ عێراق كردوویه‌تی بۆ ئاوه‌دانكردنه‌وه‌ی ئه‌و وڵاته‌ به‌ بڕی پێنج ملیار دۆلار و گوتی: "به‌رده‌وامین له‌ هه‌وڵه‌كان بۆ كردنه‌وه‌ی ده‌روازه‌ی سنووری ئۆڤای و كردنه‌وه‌ی ئه‌و ده‌روازه‌یه‌ كاریگه‌ریی باشی ده‌بێت بۆ بازرگانی كردن له‌گه‌ڵ عێراق".

ناوبراو تیشكی خسته‌ سه‌ر ئه‌وه‌ی كه‌ توركیا له‌ به‌رنامه‌یدایه‌ ئه‌مساڵ كۆنسووڵخانه‌ له‌ مووسڵ، به‌سره‌، كه‌ركووک و نه‌جه‌ف بكاته‌وه‌ و گوتیشی: "له‌و ڕێگایه‌وه‌ به‌رده‌وامی ده‌ده‌ین به‌ نزیكبوونه‌وه‌ له‌ سه‌رجه‌م ناوچه‌ و چین و توێژه‌كانی عێراق".

ئاکسۆی ئاماژه‌ی به‌وه‌ دا كه‌ وڵاته‌كه‌ی سزاكانی سه‌ر ئێران به‌ باش نازانێت و پێی وایه‌ سزاكان زیان به‌ گه‌لی ئێران و سه‌قامگیریی ناوچه‌كه‌ ده‌گه‌یه‌نن.

پێشتریش فاتح یڵدز باڵیۆزی توركیا له‌ به‌غدا ڕایگه‌یاندبوو كه‌ داوای كردنه‌وه‌ی كونسووڵخانه‌ی كه‌ركووک و نه‌جه‌فیان پێشكه‌شی وه‌زاره‌تی ده‌ره‌وه‌ی عێراق كردوووه‌.

سه‌رچاوه‌: هه‌واڵده‌ریی ئه‌نادۆڵو

کۆدی هه‌واڵنێر: 60103