بەپێی هەواڵی کوردپرێس، سه‌فین دزه‌یی به ماڵپه‌ڕی فه‌رمیی پارتی ڕاگه‌یاندووه، ''ساڵی 2011 کاتێک ئه‌مریکا له عێراق کشایه‌وه دواتر هێزی عێراق به‌چه‌ند ساڵێک دوای ئه‌وه له مووسڵ تێکشکا و له ماوه‌یه‌کی که‌مدا داعش یه‌ک له‌سه‌ر سێی خاکی عێراقی داگیر کرد، ئێستاش به‌هه‌مان شێوه پێویسته هێزی پێشمه‌رگه و سوپای عێراق و هێزی هاوپه‌یمانان هه‌مانگیی زیاتر بکه‌ن، له چوارچێوه‌ی ئه‌و هه‌ماهه‌نگییه‌ی هه‌یه ده‌کرێت زاڵ ببن به‌سه‌ر بارودۆخه‌که‌دا و ده‌کرێت ڕێگا بگرن له هه‌ر پێشهاتێکی خراپ.''
ناوبراو وتیشی، ''هه‌رێمی کوردستان به‌شێکە له عێراق و به‌پێی یاسا ئه‌و جۆره ڕێککه‌وتنه‌نانەی که ئه‌مریکا له عێراق، یان کوردستان بمێنێته‌وه، ئه‌وه له ده‌سه‌ڵاتی حکوومه‌تی عێراقه و کوردستانیش چالاکانه نوێنه‌رایه‌تیی هه‌بووه له گفتوگۆی ستراتیژیی ئه‌مریکا و عێراق و به‌ڕاشکاوانه قسه‌ی خۆی کردووه و هه‌ر ڕێککه‌وتنێک له‌نێوان واشنتۆن و به‌غدا هه‌بووبێت کوردستانیش بڕیار و قسه‌ی خۆی هه‌بووه و ئه‌و هێزانه‌ی ئه‌مریکا که ده‌کشێنه‌وه هێزی شه‌ڕکه‌رن، به‌ڵام به مانای ئه‌وه نایه‌ت هاوپه‌یمانان له عێراق نامێنن، نه‌خێر به‌ڵکوو شێوه‌ی مامه‌ڵه‌یان و شێوه‌ی مانه‌وه‌یان ده‌گۆڕێت.''
له‌باره‌ی ئه‌وه‌ی ئه‌گه‌ر داعش به‌هێزتر بوو کوردستان ده‌توانێت داوا بکات هێزی ئه‌مریکا له کوردستان بمێننه‌وه؟ سه‌فین دزه‌یی ده‌ڵێت: ''ئه‌گه‌ر خوانه‌خواسته مه‌ترسییه‌کان زیاتر بن، ئه‌وه ده‌کرێت و پێویسته قسه‌ی زیاتری له‌سه‌ر بکرێت.''
ناوبراو ڕاشیگه‌یاندووه: "به‌داخه‌وه له‌ماوه‌یه‌کی که‌م هێرشی تیرۆستانی داعش کرایه سه‌ر هێزی پێشمه‌رگه‌ی کوردستان و له ئه‌نجامدا پۆلێک پێشمه‌رگه شه‌هید بوون، دوای ئه‌و په‌لاماردانه دۆستانی کوردستان و هاوپه‌یمانان هاتنە سه‌ر خه‌ت و ئیدانه‌ی ئه‌و کرده تیرۆریستییه‌یان کرد و جه‌ختیان له‌وه کرده‌وه که ده‌بێت هه‌ماهه‌نگییه‌کان زیاتر بکرێت و له‌و شوێنانه‌ی داعش هێرش ده‌کات بنه‌بڕ بکرێت.
Your Comment