گەلۆ عیسا ئەندامی لیژنەی ناوەندیی پارتی دیموکراتی کورد لە سووریا (P.D.K.S) لە گفتوگۆ لەگەڵ کوردپرێسدا ئاماژەی دا بە بەفەرمی ناساندنی بەڕێوەبەرایەتی خۆسەری کوردستانی سووریا لەلایەن پەرلەمانی هەرێمی کەتەلۆنیاوە و ڕایگەیاند: ئەمە هەنگاوێکی ئەرێنییە و هیودارین کۆمەڵگای نێودەوڵەتیش هەنگاو بۆ بەفەرمی ناساندنی ئیدارەی خۆسەر هەڵبگرێت بەتایبەت پێویستە ئەو وڵاتانەی داخڵی پرسی سووریا بوونەتەوە لەمبارەوە هەوڵ بدەن.
ناوبراو درێژەی دا: هیوادارین وڵاتانی زلهێز لەوان ئەمریکا و ڕووسیاش لەمبارەوە کردارێکی ئەرێنی بنوێنن چوونکە ئیدارەی خۆسەری دیموکراتیک نموونەیەکی سەرکەوتووی جێگیر کردنی ئاشتی و دیموکراسییە لەنێوان میللەتەکاندا و لە ئەزموونەکەیدا سەرکەوتووە.
گەلۆ عیسا زیاتر وتی: نموونەی ئیدارەی خۆسەر دەتوانێت سەرمەشقێکی باش بێت بۆ سووریای دیموکرات و ناناوەندی.
ئەندامەکەی لیژنەی ناوەندیی پارتی دیموکراتی کورد لە سووریا جەختی کردەوە: ئێمە سپاسی پەرلەمانی کەتەلۆنیا دەکەین و هیوادارین وڵاتانی دیکەش هەنگاوی هاوشێوە هەڵێنن تا مەیەنەتیی کورد و دیکەی ئەتنیکەکانی سووریا کۆتایی بێت و ببێتە نموونەیەکی سەرکەوتوو بۆ هەموو سووریا.
Your Comment