«هۆشەنگ دەروێش» نوێنەری ئەنجومەنی سووریای دیموکرات لە هەرێمی کوردستانی عێراق لە وەڵامی پرسیارێکی کوردپرێسدا کە ئایا لە ئێستادا دانوستانێک لە نێوان ئیدارەی خۆسەر و حکوومەتی ناوەندیدا لەبارەی دۆخی ناوچەکە بەڕێوە دەچێت؟ وتی: لە ئێستادا هیچ دانوستانێک لەنێوان ئیدارەی خۆسەر و حکوومەتی ناوەندیدا بوونی نییە بەڵام ئێمە وەکوو ئەنجومەنی سووریای دیموکرات ئامادە هەر چەشنە گفتوگۆیێکین بۆ چارەسەری کردنی پرسی سووریا.

ناوبراو درێژەی دا: حکوومەتی ناوەندی هەمان عەقڵییەتی پێش 2011 هەیە و پێبەندی دانوستان نییە. بێ گومان چارە کردنی پرسی سووریا پێویستی بە گفتوگۆی سووری-سووری هەیە و ڕێگایێکی تر لەبەردەست نییە.

ناوبراو جەختی کردەوە: ئێمە وەکوو دەنجومەنی سووریای دیموکرات هیچ مەرجێکمان بۆ گفتوگۆ دانەناوە و پرسەکان لە کاتی دانوستاندا دەردەکەون و ئەو کاتەیە کە دەتوانین لەسەر ناکۆکییەکان قسە بکەین.

نوێنەری ئەنجومەنی سووریای دیموکرات لە هەرێمی کوردستانی عێراق وەبیری هێنایەوە: لە ئێستادا حکوومەتی ناوەندیی سووریا هیچ ئیرادەیێکی نییە و نە لەسەر پرسە سیاسییەکان و نە لە سەر پرسە سەربازییەکان توانای بڕیاردانی نییە و هێزەکانی ترن کە بڕیار بۆ سووریا دەدەن.

هۆشەنگ دەروێش وتیشی: تا ئەو کاتەی زلهێزەکان نەیانەوێت و تا ئەو کاتە کە بەرژەوەندییەکانیان لە سووریا بەدەست نەهێنن قەیرانی سووریا کۆتایی پێنایەت.

ناوبراو جەختی کردەوە: ڕێگاچارەی قەیرانی سووریا تەنها گفتوگۆ و دانوستانە و ئێمە وەکوو ئەنجومەنی سووریای دیموکرات ئامادە هەر چەشنە گفتوگۆیێکین بۆ چارەسەری کردنی پرسی سووریا.

کۆدی هەواڵنێر: 60113