بەپێی هەواڵی کوردپرێس، عەبدوڵا ئۆجه‌لان، ڕێبه‌ری زیندانیكراوی پارتی كرێكارانی كوردستان (PKK) لە پەیامی سەری ساڵدا، ئاماژەی دا بە پڕۆسەی یەکگرتنی نێوان هێزەکانی سووریای دیموكرا (SDF) و سوپای نوێی سووریا و ڕایگه‌یاند: "جێبەجێکردنی ڕێککەوتنەکە دەبێتە هۆی ئاسانکاری و خێراترکردنی پرۆسەکە، زۆر گرنگە تورکیا ڕۆڵێکی ئاسانکاری و بنیاتنەر لەو پڕۆسەیەدا بگرێتە ئەستۆ".

لە پەیامەکەیدا، ئۆجەلان ڕایگەیاندووە، ئەم قۆناغە نوێیە دەبێتە سەردەمی ئازادیی ژن و یەکگرتنی گەلان لەگەڵ بەها دیموکراتییەکان لە ئاشتیدا.

سەبارەت بە پرسی کورد، ئۆجەلان چارەسەرییەکەی بە "ئاشتیی کۆمەڵایەتی و ڕێککەوتنی دیموکراتی"یەوە بەستەوە و هۆشداری دا لە بەکارهێنانی ڕێبازی سەربازی و ئەمنی.

لەبارەی دۆخی سووریاوە، ڕێبەری زیندانیکراوی پەکەکە ئاماژەی بەوە دا، دیمەنە ئاڵۆزەکەی ئەو وڵاتە: "ڕەنگدانەوەیەکی ڕوونی پێویستیی دیموکراتیزەکردنە" و پشتیوانیی خۆی بۆ ئەو مۆدێلە سیاسییە دیموکراتییە دەربڕی کە بەپێی ئەو مۆدێلە، گەلان دەتوانن پێکەوە خۆیان بەڕێوەببەن، وەک لە چوارچێوەی لێکتێگەیشتنی نێوان هێزەکانی سووریای دیموکرات (هەسەدە) و حکوومەتی دیمەشق لە ۱۰ی ئاداردا ئاماژەی پێکراوە.

هەروەها داوای لە تورکیا کرد لەم پرۆسەیەدا "ڕۆڵێکی ئاسانکار، بنیاتنەر و کراوە بۆ دیالۆگ" بگێڕێت. بە گوتەی ئەو، ئەمە هەم بۆ ئاشتیی ناوچەیی و هەم بۆ بەهێزکردنی ئاشتیی ناوخۆیی خۆی گرنگییەکی ژیانی هەیە.

ئۆجەلان لە پەیامەکەیدا ئاماژەی بەوە کردووە، نەتەوەپەرستی لە ماوەی سەدەی ڕابردوودا هاوشان لەگەڵ هێرشە ئیمپریالیستییەکان، ڕۆژهەڵاتی ناوەڕاستی ڕووبەڕووی پێکدادانی قووڵ، وێرانکاری و لێکترازانی کۆمەڵایەتی کردووەتەوە. ئەو گوتی: "ئەمڕۆ هەموو تایفەگەری و نەتەوەپەرستییە نەتەوەییەکانی ناوچەکە، ڕەگ و ڕیشەیان لەم مێژووە نزیک و پڕ لە ئازارەوە وەرگرتووە. بەداخەوە ستراتیژی 'پارچە بکە، بەڕێوەببە و هانی بدە'ی سیستەمی هەژموونگەرایی بە شێوازی جیاواز بەردەوامە".

 لە بەرامبەر ئەم مێژووەدا، ئۆجەلان دیدگای "ئاشتی و کۆمەڵگەی دیموکراتی" وەک "پێویستییەکی مێژوویی" و "دژەژەهرێک" بۆ ڕێگریکردن لە پێکدادانی نوێ پێشکەش دەکات.