«حسێن مەستۆ» ئەندامی مەکتەبی سیاسی پارتی دیموکراتی کوردستانی سووریا (الپارتی) لە گفتوگۆ لەگەڵ کوردپرێسدا ئاماژەی دا بە گرێبەستی نەوتیی نێوان کۆمپانیای نەوتیی ئەمریکیی کرسێنت و بەڕێوەبەرایەتی خۆسەری کوردستانی سووریا و ڕایگەیاند: ئێمە ئاگامان لەم گرێبەستە نییە. ئەمریکا لە هەر شوێنێک بەرژەوەندییەکانی دەستەبەر بێت لەو شوێنە ئامادە دەبێت و ئەمڕۆ کێڵگە نەوتییەکانی باکوور و ڕۆژهەڵاتی سووریا دەپارێزێت. هە رگرێبەستێک بەرژەوەندیی خەڵکی ئێمەی تێدا نەبێت ئیعتیباری نییە.
ناوبراو زیاتر وتی: ئەمڕۆ نرخی کاڵا و شت و مەک لە کوردستان زۆر گرانە و نرخی نەوت و گاز و ئاو و کارەبا زۆر بەرز بووەتەوە و ئەمەش دەریدەخات کە بەڕێوەبەرایەتیی خۆسەر شتێکی بەدەستەوە نییە و ئەمریکا دەستی بەسەر کاروباری نەوتیی کوردستانی سووریادا گرتووە.
ئەندامی مەکتەبی سیاسی پارتی دیموکراتی کوردستانی سووریا (الپارتی) درێژەی دا: بەڕێوەبەرایەتی خۆسەر و حکوومەتی ناوەندیی سووریا هیچ دەسەڵات و بڕیارێکیان بەدەستەوە نییە و ئەمریکا و ڕووسیا کە بەدوای سەرچاوەکانی ئەم وڵاتەدان خەریکی حوکمڕانین لەم ناوچەیەدا.
کۆدی هەواڵنێر: 60113
Your Comment