بەپێی هەواڵی کوردپرێس، محەمەد ڕێكانی، ئەندامی داواکاری گشتیی هەرێم، نووسراوێکی بەدواداچوون ئاڕاستەی سەرۆکی داواکاری گشتیی هەرێم کردووە، لە دژی داگیرکاریی و دەستدرێژییەکانی تورکیا لەناو خاکی هەرێم، هەروەها داوا لە لەتیف ڕەشید، سەرۆک کۆماری عێراق و نێچیرڤان بارزانی، سەرۆکی هەرێمی کوردستان دەکات ڕێکاری یاسایی بگرنەبەر لە دژی بەزاندنی سنووری هەرێم و پێشێل کردنی سەروەریی عێراق و ڕێگری کردن لە گوندنشینانی هەرێمی کوردستان کە بچنەوە گوندەکانیان.

ئەم سکاڵایە لە پاش بڵاوبوونەوەی دیمەنێک دێت کە سوپای تورکیا لە برادۆست ڕێگری لە گوندنشینان دەکەن بچنەوە گوندەکانیان و داوای کارتی نیشتمانییان لێ دەکەن و سووکایەتییان پێ دەکەن.

دەقی سکاڵانامەکەی د. محمد ڕێکانی ئەندامی داواکاری گشتیی هەرێم:

بەڕێز: سەرۆکی داواکاری گشتیی هەرێمی کوردستان

بابەت: ڕێکاری یاسایی

وەک بەڕێزتان ئاگادارن کە سەروەری خاکی هەرێمی کوردستان لە چوارچێوەی سەروەری خاکی وڵاتی عێراقدایە، هەر پێشێلکردنێکی ئەم سەروەرییە، دەبێتە پێشێلکردنی دەستووری عێراقی ٢٠٠٥ ماددەی ٨ و ٦٧ ،هەروەها ئەرکی سەرۆکی کۆماری عێراقە بەپێی ماددەکانی سەرەوە، کە سەروەری خاکی عێراق و کوردستان بپارێزێت، بەهەمانشێوەش ئەرکی سەرۆکی هەرێمی کوردستانە بەپێی ئەو سوێندەی خواردوویەتی کە لەمادەی ٩ـی یاسای سەرۆکایەتی هەرێمی کوردستانی ساڵی ٢٠٠٥ هاتووە، کە یەکێتی و بەرژەوەندییەکانی هاوڵاتییانی هەرێمی کوردستان بپارێزیت، بەپێی ئەو گرتە ڤیدیۆیەی بڵاو بووەتەوە دەردەکەوێت، کە هێزێکی سوپای تورکی لەناو خاکی کوردستان ڕێگە لە هاوڵاتییانی سڤیلی کوردستان دەگرن کە بچنەوە سەر گوند و شوێنی خۆیان، کە ئەمەش بە پێشێلکردنی دەستووریی و یاساییەکانی عێراق و هەرێمی کوردستان دادەنرێت و سوکایەتی و پێشێلکردنی مافی هاوڵاتییانی کوردستانە، بۆیە داوا لە بەڕێزتان دەکەم ڕێکاری یاسایی بگرنەبەر بەپێی یاسا بەرکارەکان دژی ئەم سەرپێچیە و لایەنی کەم تەرخەم.