بەپێی هەواڵی کوردپرێس، ناوەندی ڕاگەیاندنی هێزەکانی پاراستنی گەل (هەپەگە) بڵاوی کردەوە؛ لە ڕۆژانی نەورۆزدا و بەبێ وەستان، سوپای تورکیا چیاکانی کوردستانی بۆردوومان کردوە، بۆ ئەو مەبەستەش هێزەکانی گەریلا  رێکاری گونجاویان بەجۆرێک گرتوەتەبەر کە بۆردوومانەکە هیچ زیانێک بە هێزەکان نەگەیەنێت.

هەپەگە ڕوونی کردوەتەوە، فڕۆکە جەنگییەکانی تورکیا (۱۴) جار هێرشیان ئەنجام داوە کە لە رۆژانی (۲۰، ۲۱ و ۲۲ـی ئادار) گۆڕەپانەکانی بەرخۆدانی لۆلان و گۆشینی هەرێمی خواکوڕک دوو جار، گۆڕەپانەکانی دێڕەشێ و سیانی هەرێمی گارە پێنج جار، گۆڕەپانی بەرخۆدانی بێشیلی هەرێمی مەتینا سێ جار، گۆڕەپانی بەرخۆدانی چیای بەهاری هەرێمی شەهید دەلیلی ڕۆژئاوای زاپ چوار جار بۆردوومان کردون.

ئەوەشی خستوەتەڕوو، لە ڕۆژانی (۲۰ و ۲۱ـی ئادار) سوپای تورکیا بە بەکارهێنانی چەکی قورس و تۆپ و هاوەن هەریەک لە هەرێمی خواکوڕک، هەرێمی گارە، هەرێمی مەتینا و هەرێمی شەهید دەلیلی ڕۆژئاوای زاپ (۶۹۸) جار تۆپباران کردون.

ناوەندی راگەیاندنی هێزەکانی پاراستنی گەل (هەپەگە) ئاماژەی بۆ ئەوەش کردوە، بەرپرسانی دەوڵەتی تورک بەزارەکی باس لەوە دەکەن کە ئەم نەورۆزە وەک جەژنی بەهار و خوشک و برایەتی پیرۆز دەکەن، بەڵام (۷۱۲) جار لە ئاسمان و زەوییەوە هێرش بۆسەر کوردستان زیان گەیاندن بە سروشتی جوانی ئەنجام داوە.