بەپێی هەواڵی کوردپرێس، ڕۆژی چوارشەممە ۲۹ـی کانوونی دووەمی ۲۰۲۵، عه‌قید حه‌سه‌ن عه‌بدولغه‌نی، وته‌بێژی به‌ڕێوه‌بردنی ئۆپه‌راسیۆنه سه‌ربازییه‌کانی سووریا، له میانی چالاکییه‌کانی کۆنگره‌ی ڕاگه‌یاندنی سه‌رکه‌وتنی شۆڕشی سووریا ڕایگه‌یاند: ئه‌حمه‌د شه‌رع سه‌رۆکایه‌تی وڵات ده‌کات له قۆناغی ڕاگوزه‌ردا و ئه‌رکه‌کانی سه‌رۆکی کۆمار به‌جێ ده‌هێنێت و نوێنه‌رایه‌تیی سووریا له ناوه‌نده نێوده‌وڵه‌تییه‌کاندا ده‌کات.
وته‌بێژی به‌ڕێوه‌بردنی ئۆپه‌راسیۆنه سه‌ربازییه‌کانی سووریا، باسی لەوە کرد، هەموو گرووپە چەکدارەکان، ئۆرگانە سیاسییە شۆڕشگێڕ و مەدەنییەکان هەڵدەوەشێنەوە و تێکەڵ بە دامودەزگاکانی دەوڵەت دەکرێن، هەروەها هەڵوەشاندنەوەی سوپا و دامەزراندنەوەی لەسەر بناغە نیشتمانییەکان ڕادەگەیەنین.
جەختی لەوەش کردەوە، حزبی به‌عس و هەموو دەزگە ئەمنییەکانی سەر بە ڕژێمی پێشوو و هەموو ئەو میلیشیایانە کە لەلایەن ڕژێمی لەکارخراوەوە دامەزرابوون، هەڵدەوەشێنەوە.
عه‌قید حه‌سه‌ن عه‌بدولغه‌نی، دەڵێت: شەرع، فەرمانی پێکهێنانی ئەنجوومەنی یاسادانانی کاتیی بۆ قۆناغی ڕاگوزەر دەدات، کە ئەرکەکانی بەڕێوەبردنی وڵات دەگرێتە ئەستۆ تاوەکوو دەستوورێکی هەمیشەیی پەسەند دەکرێت و دەچێتە بواری جێبەجێ کردنەوە.
هەر ئەمڕۆ ئەحمەد شەرع، سەرۆک قۆناغی ڕاگوزەر لە سووریا، یەکەم گوتاری فەرمی خۆی لەژێر ناوی "گوتاری سەرکەوتن" پێشکەش کرد و بەشێک لە وتارەکەی بۆ مێدیاکان ئاشکرا کرا.
سەرۆکی قۆناغی ڕاگوزەر لە سووریا، لە گوتارەکەیدا دووپاتی کردەوە، "ئەولەوییەتەکانی ئەمڕۆی سووریا پڕکردنەوەی بۆشایی دەسەڵات و پاراستنی ئاشتیی مەدەنی و بنیدنانی دامەزراوەکانی دەوڵەتە، هەروەها کارکردنە لەسەر بنیادنانی پێکهاتەیەکی ئابووری گەشەسەندوو و گەڕاندنەوەی پێگەی نێودەوڵەتی و ناوچەیی بۆ سووریا."
گوتیشی: سوورییەکان کۆتوبەندی ڕژێمی ئەسەدیان شکاند و خۆری سووریا هەڵهات، ئێمە بێ وێرانکاری و خوێنڕشتن سەرکەوتین.
بەرەبەیانی ڕۆژی یەکشەممە ۹ـی کانوونی یەکەمی ۲۰۲۴، دوای کشانەوەی هێزەکانی ڕژێم لە دامودەزگە گشتییەکانی دەوڵەت، گرووپە چەکدارە ئۆپۆزسیۆنەکانی سووریا چوونە ناو دیمەشقی پایتەخت و کۆنترۆڵیان کرد و بەمەش کۆتاییان بە دەسەڵاتی ۵۳ ساڵەی بنەماڵەی ئەسەد هێنا.
ئەحمەد شەرع سەرۆکی قۆناغی ڕاگوزەر لە سووریا
ئه‌حمه‌د شه‌رع کێیه؟
-له ساڵی ۱۹۸۲ له دایک بووه.
-فه‌رمانده‌ی ده‌سته‌ی ته‌حریر شام بووه.
-چه‌ند ساڵێک له لیستی تیرۆری ئه‌مریکادا بووه.
-له ساڵی ۲۰۰۶ بۆ ۲۰۱۱ بۆ ماوه‌ی پێنج ساڵ له عێراق زیندانی کراوه.
-له ساڵی ۲۰۱۶ په‌یوه‌ندییه‌کانی له‌گه‌ڵ ڕێکخراوی قاعیده پچڕاند.
-دوای ساڵی ۲۰۱۷ حکوومه‌تێکی ڕاگوزه‌ری له پارێزگای ئیدلب پێک هێنا.
-له ساڵی ۲۰۲۱ پاشه‌کشه‌ی له هه‌ڵوێسته‌کانی دژی ئه‌مریکا کرد.
-له مانگی کانوونی یەکەمی ساڵی ۲۰۲۴ سه‌رۆکایه‌تیی سه‌رکه‌وتنی شۆڕشی سووریای دژی رژێمی ئه‌سه‌د کرد.
Your Comment