بەپێی هەواڵی کوردپرێس، ئاژانسی پەنابەرانی سەر بە نەتەوەیەکگرتووەکان ڕایگەیاندووە، لە دوای ڕووخانی دەسەڵاتی بەشار ئەسەدەوە، ۹۴۸ پەنابەری سووریایی لە هەرێمی کوردستانەوە گەڕاونەتەوە ناوچەکانی ژێر کونترۆڵی هەسەدە و سووریا، ۱۰۵ لەوانەی گەڕاونەتەوە، ناوی خۆیان لای نەتەوەیەکگرتووەکان وەکوو پەنابەر تۆمار کردووە.
ئاژانسەکە بڵاویکردەوە، لەوەتەی ڕژێمی بەشار ئەسەد لە ۸ی کانوونی یەکەمی ڕابردووەوە ڕووخاوە، زیاتر لە ۱۱۵ هەزار سووریایی گەڕاونەتەوە وڵاتەکەیان و زۆربەشیان لە وڵاتانی تورکیا و ئوردنەوە گەڕاونەتەوە.
لەبارەی گەڕانەوەی پەنابەران لە هەرێمی کوردستان بۆ کوردستانی سووریا و سووریا، ئاژانسەکە رایگەیاندووە، لە هەشتی مانگی ڕابردووەوە تاوەکوو ۲ی ئەم مانگە، ۹۴۸ کەس لە رێگەی دەروازەی پێشخابوورەوە گەڕاونەتەوە سووریا.
هەر بەگوێرەی ئاژانسەکە، نزیکەی ۶۶۴ هەزار سووریایی هێشتا لەنێوخۆی سووریا ئاوارەن و زۆربەی ئاوارەکانیش خەڵکی پارێزگاکانی حەلەب و ئیدلبن، لانیکەم ۴۸۶ هەزار ئاوارە گەڕاونەتەوە بۆ ناوچەکانی خۆیان، کە زۆربەیان گەڕاونەتەوە حەلەب.
Your Comment