بەپێی هەواڵی کوردپرێس، لە ڕاگەیەندراوى ئەنجوومەنى سەرکردایەتی کۆمەڵى دادگەریى کوردستاندا ئاماژە بەوە کراوە، به سه‌رپه‌رشتی عه‌لی باپیر، سەرۆکی کۆمەڵی دادگەری، سه‌رکردایه‌تیی حیزبەکە کۆ بووەوە و بڕیاردرا به ئه‌نجامدانی کۆنگره له مانگی چوارى ۲۰۲۵، بۆ ئه‌و مه‌به‌سته‌ش لیژنه‌ی ئاماده‌کاریی کۆنگره راده‌سپێردرێت بۆ ئه‌نجامدانی کاره‌کانیان له کاتی دیاری کراودا.
ئەوەش خراوەتەڕوو، "ده‌سه‌ڵاتدارانی هه‌رێمی کوردستان مووچه‌یان به‌بارمته گرتووه و ده‌ستیان ناوه‌ته بینه‌قاقای خه‌ڵکی هه‌رێمی کوردستان، که تاوەکوو ئێستا له کۆتایی مانگی ۱۲دا مووچه‌ی مانگی ۱۱ دابه‌ش نه‌کراوه، کە داهاتی ناوخۆ له فرۆشتنی نه‌وت به تانکه‌ر و ئه‌و باج و خه‌راجه زۆره‌ی له هاونیشتمانییانى کوردستان وه‌رده‌گیرێت، که‌س نازانێت چی لێ ده‌کرێت، زۆر بێباک و خه‌مساردانه مامه‌ڵه‌ی له‌گه‌ڵ ده‌که‌ن".
کۆمەڵی دادگەریی کوردستان، جووڵانەوەیەکی سیاسیی ئیسلامییە و لەلایەن عەلی باپیر و ژمارەیەک سەرکردەى دیکە لە ئایاری ۲۰۰۱ دامەزراوە و لە چوارەمین کۆنگرەی حیزبەکەدا، ئاڵا، ناوی حیزب و پۆستی ئەمیر، بە زۆرینەی دەنگی ئەندامانی کۆنگرە گۆڕدرا و ناوی حیزبەکەى لە کۆمەڵی ئیسلامیی کوردستانەوە کرد بە کۆمەڵی دادگەریی کوردستان و پۆستی ئەمیریشیان کردە سەرۆک، ۲۲ ئەندامی سەرکردایەتی هەیە و سیانیان ژنن.
Your Comment