بەپێی هەواڵی کوردپرێس، لە چوارچێوەی زنجیرەیەک دیداری فەرمیدا، قاسم ئەعەرەجی ڕاوێژکاری ئاسایشی نیشتیمانی عێراق و شاندی باڵای ئەمنیی یاوەری لەگەڵ سەرلەشکەر حوسێن سەلامی فەرماندەی گشتی سوپای پاسداران کۆماری ئیسلامی ئێران کۆبووەوە.

لە ڕاگەیەندراوی نووسینگەی ئەعرەجیدا سەبارەت بەو کۆبوونەوە هاتووە: لە کۆبوونەوەکەدا پێداچوونەوەی هەمەلایەنە بە پەیوەندییە دووقۆڵییەکان و وردەکارییەکانی ڕێککەوتنی هاوبەشی ئەمنی نێوانیان ئەنجامدرا؛ هەروەها گرنگیی کۆنترۆڵ کردنی سنوورەکان و ڕێگری کردن لە دزەکردن تاوتوێ کران.

وەک لە ڕاگەیێندراوەکەدا هاتووە: لە کۆبوونەوەکەدا سەلامی سوپاس و پێزانینی خۆی بۆ حکوومەتی فیدراڵی و هەرێمی کوردستان دەربڕی بۆ پشتیوانی کردن لە جێبەجێکردنی ڕێککەوتنە ئەمنییەکان و سەرکەوتنەکانی هەنگاوەکانی.

هەروەها سوپاس و پێزانینی لایەنی ئێرانی دەربڕیوە بۆ لیژنەی باڵای عێراق کە سەرپەرشتی جێبەجێ کردنی ڕێککەوتنی ئەمنی نێوان هەردوو وڵات دەکات بە سەرۆکایەتی ڕاوێژکاری ئاسایشی نیشتمانی قاسم عەرەجی.