بەپێی هەواڵی کوردپرێس، جه‌مال شه‌شۆ ئه‌ندامی ئه‌نجوومه‌نی پارێزگای نه‌ینه‌وا له فراکسیۆنی پارتی دیموکراتی کوردستان، بە ماڵپەڕی "وشه"ی ڕاگەیاندووە: ماوه‌یه‌کی زۆره ئه‌نجوومه‌نی پارێزگای نه‌ینه‌وا دوای بڕیاری نایاسایی که بۆ گۆڕینی به‌رپرسانی یه‌که‌ی ئیداری ده‌ریانکرد، ھیچ کۆبوونه‌وه‌یه‌کیان نه‌کردووه و ئێسته به‌ره‌ی حه‌شدی شه‌عبی و یه‌کێتی کێشه‌یان تێکه‌وتووه، پێشتر که زۆرینه بوون و 16 ئه‌ندام بوون، ئێسته ئه‌ندامێکی ئافره‌تی حزبه‌که‌ی محه‌مه‌د حه‌لبووسی لێیان جیا بووه‌ته‌وه و ئه‌وانیش زۆرینه نه‌ماون، پێویستیان به پارتی و سوننه ھه‌یه بۆ ئه‌وه‌ی بتوانن کۆ ببنه‌وه و ئه‌وانیش مه‌رجی خۆیان ھه‌یه .
ناوبراو وتیشی، مه‌رجیان ئه‌وه‌یه سه‌رۆکی ئه‌نجوومه‌ن و جێگره‌که‌ی له پۆسته‌کانیان لابدرێن به‌ھۆی ئه‌و کاره نایاساییه‌ی ئه‌نجامیان داوه و له‌و بڕیاره‌ی داویشیانه پاشگه‌ز ببنه‌وه، ئه‌گه‌رنا ئێمه به‌شداریی ھیچ کۆبوونه‌وه‌یه‌ک ناکه‌ین و ئه‌وانیش ناتوانن ھیچ کۆبوونه‌وه‌یه‌ک ئه‌نجام بده‌ن، ھه‌ر بۆیه له دوای ئه‌و کۆبوونه‌وه‌یه‌ی ئه‌وان ئه‌نجامیان دا تا ئێسته ھیچ کۆبوونه‌وه‌یه ئه‌نجام نه‌دراوه، بۆیه پێویسته رێککه‌وتن بکرێت و دواتریش کۆبوونه‌وه‌کانی ئه‌نجوومه‌ن ده‌ست پێ بکاته‌وه.
Your Comment