بەپێی هەواڵی کوردپرێس، سەرۆکایەتی هەرێمی کوردستان لە ڕاگەیەنەراوێکدا بڵاویکردەوە، ئێواره‌ى ڕۆژی شه‌ممه نێچيرڤان بارزانى، سه‌رۆکى هه‌رێمى کوردستان له به‌غدا له‌گه‌ڵ محه‌مه‌د شياع سوودانى، سه‌رۆک وه‌زيرانى عێراقى فيدراڵ کۆ بووه‌وه و گفتوگۆیان لەبارەی باشترکردنی دۆخی خزمەتگوزاری و گوزەرانی هاوڵاتیان کرد.
لە کۆبوونەوەکە، هه‌ردوولا جه‌ختيان له گرنگيى به‌رده‌واميى گفتوگۆى بنياتنه‌رى تايبه‌ت به پرسه هاوبه‌شه‌کانى نێوان حکوومه‌تى عێراقى فيدراڵ و هه‌رێمى کوردستان کرده‌وه، هه‌روه‌ها تيشکيان خسته سه‌ر دوا پێشهاته سياسييه‌کانى وڵات و داکۆکييان له گرنگيى به‌رده‌واميى پشتگيرى له هه‌وڵه‌کانى حکوومه‌ت له‌سه‌ر ئاستى ناوخۆ و ده‌ره‌وه، هه‌روه‌ها پته‌وکردنى په‌يوه‌ندييه‌کانى هه‌ولێر ـ به‌غدا کرده‌وه، بۆ ئه‌مه‌ش پشتگيريى هه‌موو لايه‌نه سياسييه‌کانى عێراقيان به پێويست زانى.
محەمەد شیاع سوودانی سه‌رۆک وه‌زيرانی عێراق وتی: "سه‌ردانه‌کانى نێچيرڤان بارزانى بۆ به‌غدا بووە بە ئامرازی چاره‌سه‌رکردنى هه‌موو پرسه هاوبه‌شه‌کان."
له به‌رامبه‌ردا نێچیرڤان بارزانی سەرۆکی هەرێمی کوردستان ئاماژەی بەوەکرد، پێزانينى خۆى بۆ هه‌نگاوه‌کانى سه‌رۆک وه‌زيرانی عێراق دەربڕی و پێداگريی له‌سه‌ر گفتوگۆى نێوان هه‌موو لايه‌نه‌کان به مه‌به‌ستى سه‌قامگيريى سياسيى وڵات، دووپات کرده‌وه.
Your Comment