بەپێی هەواڵی کوردپرێس، باڵیۆزخانەی ئەمریکا بۆ سووریا لە تۆڕی کۆمەڵایەتیی X بڵاویکردەوە: "نیگەرانین لەو ڕاپۆرتە بەردەوامانەی لەبارەی هێرشکردنە سەر نووسینگەکانی ئەنجوومەنی نیشتیمانیی کورد لە باکووری سووریا بڵاودەبنەوە و داوای دەستبەجێ ڕاگرتنیان دەکەین".
لە درێژەی ڕاگەیێندراوەکەی باڵیۆزخانەی ئەمریکادا هاتووە کە "داوا لە هەموو لایەنەکان دەکەین رێگەیەکی ئاشتیانە و مانادار بگرنەبەر بۆ پێشخستنی خواستەکانی گەلی سووریا بێ تووندوتیژی".
ئەو ڕاگەیێندراوەی باڵیۆزخانەی ئەمریکا لە کاتێکدایە، ڕۆژی ۱-۳-۲۰۲۴ هێرشکرایە سەر نووسینگەی پارتی دیموکراتی کوردستان-سووریا- پەدەکەسە کە پێکهێنەری سەرەکی ئەنجوومەنی نیشتیمانیی کوردە.
بەرپرسانی پەدەکەسە دەڵێن، هێرشەکە لەلایەن ئەندامانی گرووپی "گەنجانی شۆڕشگێڕ"ەوە کرا کە بە نزیک لە پارتی کرێکارانی کوردستان - پەکەکە دادەندرێت.
ڕۆژی ۲ی مانگیش لە شارۆچکەی دربێسیێ و رۆژی ۶ی مانگیش لە شاری عامودێ لە رۆژئاوای کوردستان هێرشکرایە سەر نووسینگەکانی ئەنەکەسە.
گرووپی گەنجانی شۆڕشگێڕ بە ئەنجامدەری ژمارەیەک هێرشی دیکە بۆسەر نووسینگەکانی ئەنەکەسە و ئەندامانی دادەندرێت. تاوەکوو ئێستا گەنجانی شۆڕشگێڕ هیچی لەسەر هێرشەکانی ئەم مانگە نەگوتووە.
ئەنەکەسە و پەیەدە چەند ساڵێکە کێشەیان هەیە. پەیەدە هێزێکی سەرەکی پێکهێنەری دەسەڵاتی کوردستانی سووریایە و لەلایەن ئەنەکەسەوە تۆمەتبار دەکرێت بەوەی کە رێگری لێدەکات بەشداری لەو بەڕێوەبەرایەتییەدا بکا.
Your Comment