بەپێی هەواڵی کوردپرێس، مەسروور بارزانی سەرۆکی حکوومەتی هەرێم له‌میانى بەشداری‌کردنى لە فێستیڤاڵی پەیمانگەی هونەرە جوانەکانی هەولێر بۆ ساڵی 2023 قسه‌ى بۆ ڕۆژنامەوانان کردو ڕایگه‌یاند، کۆبوونەوەکەیان لەگەڵ وەزیری نەوتی عێراقی باش بووە.

بارزانی جەختی کرده‌وه‌: "حکوومەتی هەرێمی کوردستان هەموو پابەندییەکانی خۆی بەرامبەر بە حکوومەتی فیدراڵی جێبەجێ کردووە، کۆبوونەوەیەکی باشمان هەبوو لەگەڵ وەزیری نەوتی عێراقی کە لە هەمانکاتدا جێگری سەرۆک وەزیرانیشە".

سەرۆکی حکوومەتی هەرێم ئه‌وه‌شى وت: "ئەوەی لەسەر هەرێم بووه‌ لەڕووی کاری تەکنیکی یاخود یاسایی، هەرچی ئەرکی سەر حکوومەتی هەرێمی کوردستان بووە، جێبەجێ کراوە، هەمووشمان لەگەڵیان باس کرد، دەمێنێتەوە سەرئەوەی کە مافەکانی خەڵکی کوردستان وەکوو خۆی کە لە دەستووردا هاتووە، ئەوانیش رێز لەو مافانە بگرن ‌و جێبەجێیان بکەن  و شایسته‌ داراییه‌کانى خه‌ڵکى کوردستان ڕه‌وانه‌ بکەن".