بەپێی هەواڵی کوردپرێس، ڕێبەر ئەحمەد لە وتارێکدا لەکاتی کردنەوەی ژووری ئۆپراسیۆنەکان بۆ بەڕێوەبەردنی قەیران و کارەساتەکان لە ناوەندی هاوبەشی هەماهەنگی قەیرانەکان JCC وتی، وەکچۆن لە رابردوودا لەکاتی هاتنی بە لێشاوی ئاوارە و پەنابەران ڕووبەڕووی قەیرانێکی دارایی گەورە و بڕینی بوودجە و مووچە و شەڕی داعش بووینەوە، لەوکاتە کە بەشە بوودجە و مووچەی هەرێمی کوردستان بڕدرا زیاتر لە دوو ملیۆن ئاوارەی ناوخۆیی ڕوویان کردە هەرێم.
ناوبراو ئاماژەی بەوەش‌داوە، ئەمەش بەهۆی بارودۆخی ئەمنی و نەبوونی دڵنیایی بوو، خەڵک لە پارێزگاکانی دیکەی عێراق ڕوویان کردە هەرێمی کوردستان، بڕیاری حکوومەت و خەڵکی هەرێم ئەوەبوو بەهانای خەڵکەوە بچن، بەشێکی ئاوارەکان گەڕاونەتەوە زێدی خۆیان، بەڵام تاوەکوو ئێستاش نزیکەی ملیۆنێک ئاوارە و پەنابەر لە هەرێمی کوردستان نیشتەجێن.
وەزیری ناوخۆی هەرێم باسی لەوەش‌کردووە، هەندێکجار گوێمان لە لێدوانی سەیر و سەمەرەی بەرپرسانی وەزارەتی کۆچ و کۆچبەرانی عێراق دەبێت، نابەرپرسانە مامەڵە لەگەڵ بابەتی پەنابەر و ئاوارەکانی هەرێمی کوردستان دەکەن، ئێمە بە ئەرکی مرۆیی و نیشتمانی خۆمان هەستاوین و دەرگامان بۆ ئاوارە و پەنابەران کردووەتەوە و بەردەوامیش دەبین، هیچ روانگەیەکی سیاسیشمان بۆ ئەو بابەتە نییە، ئاوارەکان بە بڕیار نەهاتوونەتە هەرێم تاوەکوو بە بڕیار بگەڕێنەوە، بەڵکوو بە ئارەزووی خۆیان بڕیاریان‌داوە لە ناوچەکانی خۆیان لە ترس و دڵەڕاوکێ نەژین.
Your Comment