بەپێی هەواڵی کوردپرێس، به‌گوێره‌ی راگه‌یه‌ندراوێكی مه‌كته‌بی سیاسی یه‌كێتـی، ئه‌مڕۆ شه‌ممه‌ به‌ سه‌رپه‌رشتیی بافڵ تاڵه‌بانی،  مه‌كته‌بی سیاسی كۆبۆوه‌، كۆبوونه‌وه‌كه‌ كه‌ له‌ ده‌باشان به‌ڕێوه‌چوو، گفتوگۆی تێروته‌سه‌لی كرد له‌سه‌ر دوا پێشهاته‌كانی هەرێمی كوردستان و عێراق و ناوچه‌كه‌، به‌ تایبه‌ت پرسی مووچه‌ و گوزه‌رانی هاوڵاتیان كوردستان و دوا كۆششه‌كانی وه‌فدی حكوومه‌تی هه‌رێمی كوردستان له‌ سه‌ردانیكردنی به‌غدا و دیداره‌كانی له‌گه‌ڵ حكوومه‌ت و لایه‌نه‌ سیاسیه‌كانی عێراقدا.


هه‌ر به‌گوێره‌ی راگه‌یه‌ندراوه‌كه‌، مه‌كته‌بی سیاسی ته‌ئكیدی كرده‌وه‌ ئه‌وله‌ویه‌تی ئه‌م قۆناغه‌ ده‌بێت بۆ مووچه‌ و ژیانی هاوڵاتیان بێت، بۆ ئه‌م مه‌به‌سته‌ش گرنگه‌ رۆڵ و هه‌وڵه‌كانی یه‌كێتی له‌ حكوومه‌تی هه‌رێم و به‌غدا به‌و ئاڕاسته‌یه‌ بێت.


به‌شێكی تری كۆبوونه‌وه‌كه‌ تایبه‌ت بوو به‌ تاوتوێ كردنی سه‌ردانی وه‌فدی یه‌كێتیی به‌ سه‌رۆكایه‌تی بافڵ  تاڵه‌بانی  بۆ كۆماری ئیسلامی ئێران و دیداره‌كانی بۆ پێشخستنی په‌یوه‌ندی دۆستانه‌ی نێوان هه‌رێمی كوردستان و عێراق له‌گه‌ڵ كۆماری ئیسلامی ئێران، سه‌ره‌ئه‌نجام كۆبوونه‌وه‌ سه‌ردانه‌كه‌ و په‌یوه‌ندییه‌ هه‌رێمایه‌تی و نێوده‌وڵه‌تییه‌كانی یه‌كێتی له‌و نێوه‌نده‌دا به‌ ئیجابی و بنیادنه‌رانه‌ هه‌ڵسه‌نگاند له‌ به‌رژه‌وه‌ندی كوردستان و عێراق.


هه‌ر له‌میانی به‌ڕێوه‌چونی كۆبوونه‌وه‌ی مه‌كته‌بی سیاسیدا له‌سه‌ر دوا ئاماده‌كارییه‌كانی كۆنگره‌ی پێنجه‌می یه‌كێتیی نیشتمانیی كوردستان گفتوگۆ کرا.