بەپێی هەواڵی کوردپرێس، بەڕێوەبەرایەتیی ئاسایشی ئیستەنبووڵ بڵاوی‌کردەوە، تیمەکانی هۆبەی دژەتیرۆر لە ئاسایشی ئیستەنبووڵ، ئۆپەراسیۆنێکیان بۆ دەستگیرکردنی ژمارەیەک گومانلێکراو ئەنجام‌دا کە ئاشکراکرابوو لە پەیوەندیدان لەگەڵ رێکخراوەکانی داعش و ئەلقاعیدە.
لەو چوارچێوەیەشدا تیمەکان بۆ دەستگیرکردنی ئەو گومانلێکراوانە کە بە "تیرۆریستی بیانی" ناودەبرێن، ئۆپەراسیۆنێکیان بۆ سەر ۱۵ ناونیشان لە هەشت ناوچەی ئیستەنبووڵ کرد و ۱۶ گومانلێکراویان دەستگیرکرد.
لە هەڵمەتەکەدا ۱۵ ناونیشانەکە پشکنران، بەهۆیەوە دەست بەسەر ژمارەیەک بەڵگەنامەی دیجیتاڵی، نەخشە و چەندین ئامێری پەیوەندی‌کردن و چەکی بێمۆڵەتدا گیرا.
دوای هەڵمەتەکە، "۱۶ گومانلێکراوەکە پشکنینی تەندروستییان بۆ کرا و بە مەبەستی لێکۆڵینەوە برانە بنکەی ئاسایش".
سەرچاوە: تۆڕی میدیایی ڕووداو
Your Comment