بەپێی هەواڵی کوردپرێس، ئیدراەی خۆسەری کوردستانی سووریا ڕۆژی ۱۸ی نیسان لە بەیاننامەیەکدا دەستپێشخەرییەکی بۆ چارەسەرکردنی قەیرانی سووریا ڕاگەیاند. ئەم بەیاننامەیە ٩ بڕگەی تێدایە و یەک لەو بڕگانە پێشوازی کردنە پەنابەران و کۆچبەرانی سووریا.

لەمبارەوە شێخموس ئەحمەد، بەرپرسی فەرمانگەی کاروباری کامپ و ئاوارەکان لە بەڕێوەبەرایەتیی خۆسەری کوردستانی سووریا وتی: گوشار لەسەر پەنابەرانی سووری لە لوبنان هەیە. ئاماژەی بەوەشکرد، سورییەکان لە سوودان سەرەڕای ئەوەی داواکاریی چوونەدەرەوەیان پێشکەشی نەتەوەیەکگرتووەکان و حکوومەتی دیمەشق کردووە، نەیانتوانیوە سوودان بەجێبهێڵن و ئەو داواکاریانەش پشتگوێ خراوە.

ناوبراو زیاتر گوتی، ئیدارەی خۆبەڕێوەبەری کوردی لە ۲۷ی نیسان لیژنەیەکی بۆ گەڕانەوەی سەلامەتی هاوڵاتیانی باکوور و ڕۆژهەڵاتی سووریا پێکهێنا کە لە سوودان ماونەتەوە.

ئەحمەد لە درێژەی قسەکانیدا وتی: ئیدارەی خۆسەر لە چوارچێوەی پڕۆژەکەی بۆ چارەسەرکردنی قەیرانی سووریا دەستپێشخەرییەکی بۆ پێشوازی کردن لە پەنابەران ڕاگەیاندووە. بەڵام بۆ بەدیهێنانی ئەو دەسپێشخەرییە دەرفەتەکان سنووردارن.

شێخموس ئەحمەد لە کۆتایی قسەکانیدا وتی: ئەگەر دەروازەی تەل کۆچەر بکرێتەوە، ئیدارەی خۆسەر دەتوانێت پێشوازی لە ئاوارەکان بکات و بەمشێوەیە پێداویستیەکانیان دابین بکرێت.