بەپێی هەواڵی کوردپرێس، ڕۆژی هەینی ۲٨ی شوباتی 2020 وەزارەتی تەندروستیی عێراق لە ڕاگەیێندراوێکدا ئاماری تووشبووانی بە پەتای كۆڤید-19 لە عێراق ڕاگەیاند و بەپێی ئەو ڕاگەیێندراوە "دوێنێ پێنجشەممە دوو حاڵەتی نوێ لە دوو شاری جیاواز تۆمار كراون."
لەو راگەیێندراوەی وەزارەتی تەندروستیی عێراقدا هاتووە: "دوێنێ پێنجشەممە كەسێک لە بەغدای پایتەخت و هاووڵاتییێکی دیكە لە پارێزگای كەركووک تووشی ڤایرۆسی كۆرۆنا هاتوون، لە كاتێكدا پێشتر لە كەركووک چوار حاڵەتی تووشبوون هەبووە، بەڵام تووشبووەكەی بەغدا یەكەمین حاڵەتە لەو پارێزگایەدا."
هەروەها لە ڕاگەیێندراوەکەدا ئاماژە بەوەش كراوە "تا ئێستا ڕێژەی گشتیی تووشبووان بە ڤایرۆسی كۆرۆنا لە سەرتاسەری عێراق گەیشتووەتە شەش حاڵەت و وەزارەتی تەندروستی لایەنە پەیوەندیدارەكانی دیكە رێكاری تەواویان گرتووەتەبەر بۆ جیاكردنەوەی ئەو حاڵەتانە و ئەنجامدانی چارەسەر بۆیان."
لە كۆتاییشدا وەزارەتی تەندروستیی عێراق ڕوونی كردووەتەوە: "بە وردی چاودێری دۆخی تەندروستیی تووشبووان دەكەین و چاوەڕێی زووچاكبوونەوەیان دەكەین."

وەزارەتەکە داواشی لە سەرجەم هاووڵاتییان كردووە بە هەموو شێوەیێک پابەند بن بە رێنماییە فەرمییەكانەوە بۆ خۆپاراستن لە تووشبوون بەو پەتایەی لە بەشێكی زۆر لە وڵاتانی جیهاندا تەشەنەی سەندووە.

کۆدی هەواڵنێر: 60103