کوردپرێس:

بەپێی راگەیێنراوی حکوومەتی هەرێمی کوردستان، ڕۆژی پێنجشەممە 13ی شوباتی 2020، مەسروور بارزانی، سەرۆکی حکوومەتی هەرێمی کوردستان بە سەرۆکایەتی شاندێکی حکومی بەرەو ئەڵمانیا بەڕێدەکەوێت بۆ بەشداریکردن لە کۆنفرانسی ئاسایشی میونشن.

کۆنفرانسی ئاسایشی میونشن لە 14 - تاوەکو 16ـی ئەم مانگە بەڕێوەدەچێت. لە راگەیێنراوەکەی حکوومەتدا هاتووە "سەرۆکی حکوومەتی هەرێمی کوردستان چاوی بە گەورە بەرپرسان و بڕیاربەدەستانی جیهانی بەشدار لە کۆنفرانسەکە دەکەوێت و بارودۆخی ئێستای عێراق و ناوچەکە و پەرەپێدانی پەیوەندییەکانی هەرێمی کوردستان لەگەڵ کۆمەڵگەی نێودەوڵەتی تاوتوێ دەکات".

سەرۆکی حکوومەتی هەرێمی کوردستان بە رۆژنامەڤانانی راگەیاند، "لە پەراوێزی کۆنفرانسی میونشن چەندین دیدارمان لەگەڵ گەورە بەرپرسانی جیهان دەبێت و باس لە قوربانیدانەکانی پێشمەرگە قارەمانەکان لە شەڕی دژی تیرۆر و هەڕەشە بەردەوامەکانی داعش و تیرۆر دەکەین کە پێویستی بە هەماهەنگی زیاتری کۆمەڵگەی نێودەوڵەتییە بۆ رووبەڕووبوونەوەی ئەو هەڕەشە و مەترسییانە".

پێشتر نێچیرڤان بارزانی وەک سەرۆکوەزیرانی هەرێمی کوردستان بەشداری کۆنفرانسی ئاسایشی میونشنی کردووە و لە پەراوێزی کۆنفرانسەکەدا لەگەڵ بەرپرسانی باڵای وڵاتان کۆبووەتەوە. ئەمساڵیش وەک سەرۆکی هەرێمی کوردستان بانگهێشتنامەی فەرمی بۆ بەشداریکردن لە کۆنفرانسەکە پێگەیشتووە.

کۆنفرانسی ئاسایشی میونشن ئەمساڵ 56ـەمین کۆنفرانسە ئەنجامبدرێت، کە لە 14 بۆ 16 شوبات لە شاری میونشن لە ئەڵمانیا بەڕێوەدەچێت. بڕیارە بەدەر لە کێشە بەردەوامەکانی ئاسایش، هاوکات باس لە نیگەرانییەکانی داهاتووش بکرێت، بەتایبەتیش کە تەکنەلۆژیا لە گەشەکردن بەردەوامە.

سەرنجی کۆنفرانسەکەی ئەم ساڵ زیاتر لەسەر ئەم بابەتانە دەبێت: بەرگریکردن و سیاسەتی ئاسایش، ئاسایشی ئەلیکترۆنی و هەڕەشەکانی تەکنەلۆژیا، ئاسایشی مرۆڤایەتی، ئابووری و سەرچاوەی ئاسایش و هەروەها ئاسایشی دەرەوەی سنوورەکانی وڵاتان.