«فادی مەرعی» سەرۆکی نووسینگەی پەیوەندییە گشتییەکانی شەپێلا پێشارۆژا کوردستانی سووریا لە گفتوگۆ لەگەڵ کوردپرێسدا ئاماژەی دا بە ناکۆکییەکانی نێوان پارتی کرێکارانی کوردستانی تورکیا و پارتی دیموکراتی کوردستانی عێراق و ڕایگەیاند: دەوڵەتی تورکیا ڕێککەوتننامەیێکی لەگەڵ عێراق هەیە کە هەر کات سنوورەکانی بکەوێتە مەترسییەوە مافی ئەوەی هەیە هێزی سەربازیی بەکار بێنێت و داخڵی سنوورەکان ببێت.
ناوبراو درێژەی دا تورکیا لەم بڕگەیە کەڵک وەردەگرێت و بۆ شەڕی پەکەکە سنوورەکانی هەرێم دەبەزێنێت.
سەرۆکی نووسینگەی پەیوەندییە گشتییەکانی شەپێلا پێشارۆژا کوردستانی سووریا وتیشی: هەمووان هەرێمی کوردستان وەکوو کیانێکی فەرمی فیدارڵ لە خاکی عێراق دەناسن و پێویستە هەموو کوردێکی وڵات پارێز مۆڵەت نەدەن خەسار لەم ناوچەیە بدرێت و بیانوو بەدەست کەسێکەوە نەدەن.
فادی مەرعی ئاشکراشی کرد: پێویستە هەموو کوردێک وشیار بێت و ڕێگری بکەن لە هەموو بیانووەکان. باشتریش وایە پەکەکە بگەڕێتەوە کوردستانی تورکیا و کێشەکانی لەناو خاکی تورکیا چارەسەر بکات.
ئەندامەکەی ENKS وەبیری هێنایەوە: ڕۆڵی "مەسعوود بارزانی" زۆر گرینگە لە ڕێگری کردن لەشەڕی ناوخۆ و هەروەها کە پێشتر ڕایگەیاندووە شەڕی براکوژی حەرامە و هیوادارین لایەنەکان دەرک بەم ڕاستییە بکەن و بیانوو بەدەستی وڵاتانەوە نەدەن.
کۆدی هەواڵنێر: 60113
Your Comment