کوردپرێس:
ئێواره‌ی ڕۆژی یه‌کشه‌ممه 1ی ئه‌یلوولی 2019 نووسینگه‌ی ڕاگه‌یاندنی نووری مالیکی سه‌رۆک وه‌زیرانی پێشووی عێراق و سه‌رکرده‌ی ئێستای هاوپه‌یمانیی ده‌وڵه‌تی یاسا له به‌یاننامه‌یێکدا ڕای‌گه‌یاند که ناوبراو له نووسینگه‌که‌ی له شاری به‌غدا پێشوازی له هادی عامری سکرتێری گشتیی ڕێکخراوی به‌در و سه‌رۆکی هاوپه‌یمانیی فه‌تح کردووه.
له به‌یاننامه‌که‌دا هاتووه که دوو لایه‌ن دواپێشهاته سیاسی، ئه‌منی و ئابوورییه‌کانیان له ئاستی عێراق و ناوچه‌که تاوتوێ کردووه و ته‌ئکیدیان له‌سه‌ر هه‌ڵوێستی یه‌کده‌نگ بۆ به‌ره‌وڕووبوونه‌وه له‌گه‌ڵ کێشه‌کانی به‌رده‌م وڵات کرده‌وه.
له کۆبوونه‌وه‌که‌دا سه‌رکرده‌کانی هاوپه‌یمانیی فه‌تح و ده‌وڵه‌تی یاسا جه‌ختیان له‌سه‌ر زه‌رووره‌تی به‌رگری له سه‌روه‌ری و ئاسایشی عێراق، به‌رزکردنه‌وه‌ی ئاستی پراکتیکی ده‌وڵه‌تی عادل عه‌بدولمه‌هدی سه‌رۆک وه‌زیرانی ئێستا و ئه‌وله‌ویه‌تدانانی به‌رژه‌وه‌ندیی نیشتیمانی و ته‌رکیزکردنه سه‌ر هه‌وڵه‌کان له‌پێناو خزمه‌تگوزاری به وڵات و خه‌ڵک کرده‌وه.
سه‌رچاوه: ماڵپه‌ڕی سۆمه‌ریه نیووز
کۆدی هه‌واڵنێر: 60103
Your Comment