بەپێی هەواڵی کوردپرێس CHP لە چوارچێوەی نوێکردنەوەی ڕاپۆرتی "22 پرسیار 22 وەڵام"دا کە بۆ یەکەم جار ساڵی 2015 ئامادەی کردبوو سەرقاڵە بە پێکهێنانی لیژنەیێک بۆ یەکلاکردنەوەی مەسەلەی کورد لە تورکیا.

ڕاپۆرتی "22 پرسیار 22 وەڵام"دا کە بۆ یەکەم جار ساڵی 2015 بە فەرمانی کلچدار ئوغڵو سەرۆکی پارتەکە داڕێژرابوو لە لایەن شاندێکی نزیک لە پارتی دیموکراتیکی گەلان و سەڵاحەدین دەمیرتاش بڵاو کرایەوە و بەگوێرەی ڕاپۆرتەکەش پرسی کورد بە خوێندنەوەی ئەمنی و سەربازی چارە ناکرێت.

بەگوێرەی ئەو زانیارییانەی دەست کەوتوون ئێستا جەهەپە ڕاپۆرتەکەی نوێ کردۆتەوە و سەرقاڵە بە پێکهێنانی لیژنەیێک بۆ چارەکردن و یەکلاکردنەوەی مەسەلەی کورد لە تورکیا.

هەر بە گوێرەی زانیارییەکان جەهەپە مەسەلەی کورد تەنیا پەیوەست بە مافەکانی مرۆڤەوە نازانێت بەڵکوو زۆر ڕەهەندی دیکەش لە خۆ دەگرێت وەکوو ئاشتەواییی کۆمەڵایەتی و پێوەندییەکانی دەرەوەی تورکیا و بەدیموکراسی کردنی تورکیا و هەروەهاش ڕەهەندی ئابووری.