بەپێی هەواڵی کوردپرێس، ئەمڕۆ دووشەممە مەسعوود بارزانی سەرۆکی پارتی دیموکراتی کوردستان پەیامێکی بڵاوکردوە و تێیدا ئاماژەی بەوەداوە، "سووكایەتیكردن بە پیرۆزییەكان و هێما باڵاكان بە هیچ شێوەیەك قبووڵكراو و نیە و بەزاندنی هێڵی سوورە و زۆر بە توندی ئیدانەی ئەو سووكایەتییە دەكەین كە شەوی رابردوو لە لایەن كەسێكەوە بە مەرجەعیەت كراوە.

ناوبراو دەشڵێت، "كوردستان خاوەنی فەرهەنگی بەرزی پێكەوەژیانە و سووكایەتیكردن بە رەمز و موقەدەساتی خەڵك لە ناو فەرهەنگی گەلی كوردستان هیچ كات جێگەی نەكردووەتەوە و جێگەی نابێتەوە. گەلی كوردستان رێز و پێزانینێكی زۆری بۆ مەرجەعیەت هەیە و پەیوەندیی مێژوویی و دۆستایەتی و هاوسۆزیی نێوان بارزانی و ئایەتوڵڵا حەكیم و شەهید سەدر گەواهیە بۆ ئەو پەیوەندیی و دۆستایەتیە دێرینە."

بارزانی ئاشکراشیکردووە، "ئەو كەسەش كە سووكایەتی كردووە لە لایەن یاساوە گیراوە و سزای تاوان و زێدەرۆیی خۆی دەداتەوە."

هاوکات بارزانی زۆر بە توندی ئیدانەی سووتاندنی بارەگای پارتی دیموكراتی كوردستانی لە بەغدا کردووە و دەشڵێت، "ئەوە بۆ دووەمین جارە لە لایەن كۆمەڵێک تێكدەر و شكستخواردوو ئەنجام دەدرێت و ئەمە بەڵگەیە لەسەر بوونی پاشاگەردانی و نەبوونی سەقامگیری و ئاسایش و لە راستیدا ئەو گرووپانەش جگە لە خەراپەكاری و تێكدان و ئاژاوە هیچی تریان لەدەست نەهاتووە."

ئەمەش دوای ئەوەدیت شەوی رابردوو بەهۆی تویتێکی کادرێکی پارتی دیموکراتی کوردستان کە لەبارەی مەرجەعیەتی شیعەکانەوە کردبووی، لایەنگیرانی مەرجەعیەت لقی پێنجی پارتییان لە باغدا سووتاند.