بەپێی هەواڵی کوردپرێس، ڕەجەب تەییب ئەردۆغان سەرۆک کۆماری تورکیا لە ئەنقەرە لەگەڵ ئیسحاق ھێرزۆگ سەرۆکی ئیسرائیل کۆبوونەوە و دوای کۆبوونەوەیان لە کۆشکی سه‌رۆكایه‌تی كۆماری توركیا، کۆنگرەیەکی رۆژنامەوانیی ھاوبەشیان ئەنجامدا.

لە کۆنفرانسە ڕۆژنامەوانییە هاوبەشەکەدا سەرکۆماری تورکیا، رایگەیاند: "باوەڕم وایە ئەم سەردانە مێژووییە ببێتە خاڵێکی نوێی وەرچەرخان لە پەیوەندییەکانی تورکیا و ئیسرائیل. ئامانجی ھاوبەشمان، سەرلەنوێ بووژاندنەوەی دیالۆگی سیاسییە بە پشتبەستن بە بەرژەوەندییە ھاوبشەکانی نێوان وڵاتەکانمان و لەسەر بنەمای رێزگرتن لە ھەستیاری یەکتر".

ناوبراو گوتیشی: " لە دەستی ئێمەدایە کاربکەین بۆ ئەوەی سەرلەنوێ کولتووری ئاشتی، ئاسوودەیی و پێکەوەژیان لە ناوچەکەمان باڵادەست بکەین".

سەرکۆماری تورکیا وتیشی: لەگەڵ ھێرزۆگ بە روونی باسمان لە ھەڵوێستمان و ھەستیاریمان لەبەرامبەر پرسەکەدا خستەڕوو. گوزارشتم لەو گرنگییە کرد کە بە کەمکردنەوەی گرژییەکان لە ناوچەکە و پاراستنی روانگەی چارەسەر لەسەر بنەمای دوو دەوڵەت، دەیدەین.

ره‌جه‌ب ته‌یب ئەردۆغان گوتیشی: "جەختم لە گرنگیی پێگەی مێژوویی قودس و پاراستنی ناسنامە و پیرۆزیی ئایینی مزگەوتی ئەقسا کردەوە".

سەبارەت بە پەیوەندییەکانی نێوان تورکیا و ئیسرائیل، ئەردۆغان گوتی: "لەو بروایەدام کە لە قۆناغی داھاتوودا جگە لە پەیوەندیی دووقۆڵییمان لە رووی ھەماھەنگیی ناوچەییمان، دەرفەتی نوێ لەگەڵ خۆی دەھێنێت".

لە کۆتاییدا ناوبراو گوتیشی: "بایەخ بەو سەردانەی وەزیری دەرەوەمان دەدەم کە راستەوخۆ لە دوای ئەم سەردانە بۆ فەڵەستین و ئیسرائیل ئەنجامی دەدات. دوای ئەوەش بایەخ بەو سەردانە دەدەم کە وەزیری وزە و سەرچاوە سرووشتییەکانمان بۆ ئیسرائیل دەیکات".

شایانی باسە لە مانگی داھاتوودا وەزیری دەرەوەی تورکیا، مه‌ولوود چاوشئۆغڵو سەردانی ئیسرائیل دەکات و لەگەڵ وەزیری دەرەوەی ئەو وڵاتە کۆ دەبێتەوە.