به‌پێی هه‌واڵی کوردپرێس، ئه‌مڕۆ یه‌کشه‌ممه 17ی ئاداری 2019 سه‌رکه‌وت له‌تیف شه‌مسه‌ددین په‌رله‌مانتاری فراکسیۆنی نه‌وه‌ی نوێ له په‌رله‌مانی عێراق له لێدوانێکدا ئاماژه‌ی به حیزبه‌کانی پارتی و یه‌کێتی و بنه‌ماڵه‌ی بارزانی و تاڵه‌بانی وه‌ک سه‌رکرده‌ی دوو حیزبی ده‌سه‌ڵاتداری هه‌رێمی کوردستان کرد و ڕای‌گه‌یاند: بنه‌ماڵه‌کانی تاڵه‌بانی و بارزانی له هه‌رێمی کوردستان ده‌سه‌ڵاتێکی زۆریان به‌ده‌سته‌وه‌یه و هیچ جۆره بیرۆکه و نه‌خشه‌ڕێگایێکیان بۆ گۆڕین و به‌هێزکردنی داموده‌زگا فێرکاری و ته‌ندروستییه‌کان و ڕه‌خساندنی هه‌لی کار نییه و ته‌نها ئامانجیان مانه‌وه له ده‌سه‌ڵاته.
شه‌مسه‌ددین له‌وباره‌وه ڕاشی‌گه‌یاند: بنه‌ماڵه‌ی بارزانی به‌و بۆنه‌وه که ده‌وڵه‌تی فیدڕاڵ کۆنتڕۆڵێکی له‌سه‌ریان نییه، نه‌وت و گاز له‌لایه‌ن کۆمپانیاکانی سه‌ر به خۆیانه‌وه بۆ ده‌ره‌وه به‌قاچاخ ده‌به‌ن و زیاتر له 60 له‌سه‌دی داهاتی هه‌نارده و هاورده‌ی نه‌وتی و نانه‌وتی له ڕێگای هه‌رێمی کوردستان به‌ر بنه‌ماڵه‌ی بارزانی ده‌که‌وێت و ده‌ڕژێته حسێبی ئه‌وان و له ئه‌نجامدا به‌قاچاخ بردنی سروه‌ت و سامانی عێراق له ڕێگای پارتی ده‌سه‌ڵاتداری هه‌رێمی کوردستانه‌وه ده‌بینین.
ئه‌و نوێنه‌ره کورده‌ی په‌رله‌مانی عێراق جه‌ختی کرده‌وه: به بۆنه‌ی کێشه‌ی یاسایی و کێشه‌ی هه‌رێمی کوردستان له‌گه‌ڵ حکوومه‌تی فیدڕاڵ، نه‌وتی عێراق به‌قاچاخ هه‌نارده ده‌کرێت و به نرخێکی خوارتر له نرخی ڕاسته‌قینه‌ی خۆی ده‌فرۆشرێت که ئه‌و بابه‌ته‌ش هه‌لقۆستنه‌وه له دۆخی ئێستای وڵاته.
سه‌رچاوه: ئه‌لعه‌هد نیووز
کۆدی هه‌واڵنێر: 60103
Your Comment