بەپێی هەواڵی کوردپرێس، هۆشیار عەبدوڵڵا پەرلەمانتاری پێشووی نەوەی نوێ لە ئەکاونتی خۆی لە تۆڕی کۆمەڵایەتی فەیسبووک بڵاویکردووەتەوە، دیقەتی دوو ڕاستیی زۆر تاڵ بدەن: یەکەم هەرکات نرخی نەوت داببەزێ بەناو حکوومەتی هەرێمی کوردستان پەنا بۆ هەموو جۆرە لێبڕین و کەم کردنەوەیەک دەبات و هەموو شتێکیش بەو پاساوەوە دوا دەخات دیارترینیان یاسای بوودجە، کەچی کە نرخی نەوت بەرزە خۆی دەکات بە کەڕەی شەربەت.

باسی لەوەش کردووە، لە تەمەنی ئەم خولەی پەرلەماندا کام دانیشتن و هەوڵە جدییە هەیە بۆ ئەو تاڵانییەی لە داهاتی نەوتی هەرێم دەکرێت؟! داهاتی گەورە لە نەوتەوەیە، کەچی قسەی زیاتر لەسەر گومرگ و داهاتی نانەوتییە، کە حەتمەن ئەوەشیان گرنگە بکرێت بەڵام نەک لەسەر حسابی بێدەنگ بوون لە مەلەفی نەوت.

ئەو پەرلەمانتارەی پێشوو هێمای بۆ ئەوەش کردووە، ئەم کابینە سێ قۆڵییەی پارتی و یەکێتی و گۆڕان، یەکێکە لە خراپترین کابینەکانی حکوومەت نەک هەر تەنها لە دیزە بەدەرخۆنەکردنی داهاتی نەوت بەڵکوو لە بارگران کردنی شانی هاوڵاتی و کاسبکاران بە زۆرترین باج و سەرانەی نایاسایی.