بەپێی هەواڵی کوردپرێس، عومەر چەلیک دوای کۆبوونەوەی ناوەندی بەڕێوەبردن و بڕیاری ئاکپارتی کە بە سەرۆکایەتیی ڕەجەب تەییب ئەردۆغان لە ئەنقەرە بەڕێوەچوو، قسەی بۆ رۆژنامەڤانان کرد و لەبارەی پرۆسەی نوێی چارەسەری لە تورکیا و پرسی خۆهەڵوەشاندنەوەی پەکەکە وتی: "پێشبینی دەکەین پرۆسەی خۆهەڵوەشاندنەوەی رێکخراوی تیرۆریستی و دانانی چەک لە ماوەی چەند رۆژێکدا ببێتە کۆنکرێتی".

گوتەبێژی ئاکپارتی ئاماژەی بەوەدا، دوای خۆهەڵوەشاندنەوە و چەکدادانانی پەکەکە، قۆناخەکانی دیکەی پرۆسەکە دەستپێدەکەن.

عومەر چەلیک ئاماژەی بە بەهێزکردنی بەرەی ناوخۆی تورکیا کرد و رایگەیاند، زلهێزە ئیمپریالیستەکان دەستکاری دۆخەکە دەکەن بۆ جێبەجێ کردنی پڕۆژەکانیان لە ناوچەکەدا، بەڵام تورکیا هەوڵەکانیان پووچەڵ دەکاتەوە بە ئامانجی "تورکیایێکی بێ تیرۆر".

چەلیک، هێمای بۆ ئەوە کرد، ئامانجی تورکیایێکی بێ تیرۆر سیاسەتی کۆماری تورکیایە.