بەپێی هەواڵی کوردپرێس، سوپای ئیسرائیل لە بەیاننامەیەکدا لە تۆڕی کۆمەڵایەتیی "X" ئاماژەی بەوەکردووە، هێرشیان کردووەتە سەر پێگەی سەربازی و سیستمی موشەکی دژە فڕۆکە و ژێرخانی مووشەکی زەوی بۆ ئاسمان لە سووریا، بەبێ ئەوەی وردەکاری زیاتر بخاتەڕوو.

سوپای ئیسرائیل لە پۆستێکدا جەختی كردووە، بەردەوام دەبێت لە ئۆپەراسیۆنەکانی بۆ بەرگری کردن لە ئاسایش و هاوڵاتیانی  ئیسرائیل.

ئاژانسی هەواڵی سانا بڵاویکردەوە، "لە ئەنجامی هێرشەكانی ئیسرائیل بۆ سەر دیمەشق و دەوروبەری، کەسێک کوژراوە و چوار کەسی دیکەش بریندار بوون".

فڕۆکە جەنگییەکانی ئیسرائیل لە نزیک نەخۆشخانەی حەرەستا لە باکووری رۆژهەڵاتی دیمەشقی پایتەختی سووریا، هێرشیان كردووەتە سەر فەوجی ۴۱، هەروەها هێرشیان كردووەتە سەر گەڕەکی بەرزە لە باکوری پایتەخت.

هاوكات هێرشێکی ئاسمانی بارەگای فیرقەی یەکی ڕژێمی پێشووی کردووەتە ئامانج، لەگەڵ دەوروبەری شاری حەما لە ناوەڕاستی سووریا و پێگە سەربازییەکانی ناوچەی جەبەل شەعرە لە پارێزگای لازقیە و چەندین ناوچەی تر لە سووریا.